(ប៉ារីស)៖ លោក Zinedine Zidane ចង់ក្លាយជាគ្រូបង្វឹកក្រុមបាល់ទាត់ជម្រើសជាតិមាន់គកបារាំង ដោយមិនចាប់អារម្មណ៍ ក្នុងការដឹកនាំក្រុមជម្រើសជាតិប្រេស៊ីលឡើយ។ នេះយោងតាមលោក Robert Pires មិត្តភក្តិជិតស្និទ្ធរបស់លោកថ្លែងប្រាប់ Livescore។

ការណ៍នេះវាបានស្តែងចេញ ក្រោយពេលលោក Zidane បានជួបលោក Didier Deschamps ជាលក្ខណៈឯកជន បន្ទាប់ពីបារាំងបានចាញ់ផ្តាច់ព្រ័ត្រ World Cup ក្រោមថ្វីជើងរបស់អាហ្សង់ទីនកាលខែធ្នូឆ្នាំទៅ។

ក៏ប៉ុន្តែពេលវេលាមិនទាន់អំណោយផលលោក Deschamps ក៏បានបន្តកិច្ចសន្យាដឹកនាំមាន់គកទៀត រហូតដល់បំណាច់ World Cup 2026 ក្រោយពេលលោកកាន់តំណែងនេះតាំងពីឆ្នាំ២០១២ មក ដ្បិតលោក Zidane ក៏ត្រូវបានគេស្នើសុំឲ្យដឹកនាំបារាំង និងប្រេស៊ីលផងដែរ ក្រោយទំនេរពីការងារតាំងពីឆ្នាំ២០២១ នៅពេលលោក Tite ក៏ទើបលាឈប់ពីតួនាទីគ្រូបង្វឹកប្រេស៊ីលដូចគ្នា។

ទាក់ទងនឹងបញ្ហានេះ លោក Pires ធ្លាប់បាននិយាយទៅកាន់ Zidane ថា «អ្វីដែលគាត់ចង់ គឺជម្រើសជាតិបារាំង។ ជាការពិត ខ្ញុំយល់ចិត្តគាត់ តែពេលនេះមិនអាចទេ ព្រោះលោក Deschamps បានបន្តកិច្ចសន្យា ៤ឆ្នាំទៀតហើយ។ ពេលនេះ គាត់ (Zidane) ត្រូវតែធ្វើការផ្លាស់ប្តូរគោលដៅតិចតួច ដូចជាការវិលទៅដឹកនាំក្លិប ដោយមានក្លិបច្រើនណាស់ដែលកំពុងត្រូវការ Zizou»។

នៅចាំបានថា លោក Pires គឺជាមិត្តចាស់របស់ Zidane ដែលបានឈ្នះពាន World Cup 1998 និងពានអឺរ៉ុប Euro 2000 ក្នុងក្រុមជម្រើសជាតិបារាំងជាមួយគ្នាទៀតផង៕