(ព័ត៌មានផ្លូវការនៅទីក្រុងម៉ាឌ្រីត)៖ ក្លឹបអធិរាជស Real Madrid បានបញ្ជាក់ពីការផ្ទេរកីឡាករ Jude Bellingham ពី Borussia Dortmund ជាផ្លូវការហើយ។ ការផ្លាស់ប្តូរក្លឹបរបស់កីឡាករ Jude Bellingham ទៅកាន់កីឡដ្ឋាន Santiago Bernabeu របស់ក្លឹបអធិរាជស Real Madrid ត្រូវបានប្រកាសជាលើកដំបូងដោយក្លឹប Borussia Dortmund កាលពីសប្តាហ៍មុន ដោយក្លឹបអាល្លឺម៉ង់ ក៏បានបញ្ជាក់ពីតម្លៃផ្ទេរដ៏ធំសម្បើមចំនួន ១០៣លានអឺរ៉ូ (៨៨ លានផោន ឬ ១១០លានដុល្លារ) ផងដែរ។ បន្ទាប់មកកីឡាករវ័យ ១៩ឆ្នាំរូបនេះ បានបញ្ចប់ពីការពិនិត្យសុខភាព មុនពេលបញ្ចប់លក្ខខណ្ឌផ្ទេរជាមួយក្លឹបអធិរាជស ដែលកីឡាកររូបនេះនឹងបង្ហាញជាផ្លូវការថាជាកីឡាករថ្មីរបស់ក្លឹបនៅក្នុងសប្តាហ៍នេះ។ កីឡាករ Bellingham មានកិច្ចសន្យាជាមួយក្លឹបអធិរាជស Real Madrid រហូតដល់ឆ្នាំ ២០២៩៕