(បរទេស)៖ កីឡាករ Bruno Fernandes របស់ក្លឹបបិសាចក្រហម Manchester United បានជំរុញឱ្យក្លឹបពិចារណាលើការចុះហត្ថលេខាលើខ្សែប្រយុទ្ធ Benfica គឺកីឡាករ Goncalo Ramos ដែលជាមិត្តនៅក្រុមជម្រើសជាតិជាមួយគ្នា។ Bruno បាននិយាយទៀតថា «គាត់អាចក្លាយជាកីឡាករខ្សែប្រយុទ្ធដ៏ល្អបំផុតមួយនៅក្នុងពិភពលោក»។
The Daily Mirror បានអះអាងថាកាលពីដើមខែឧសភាថា Man United កំពុងរៀបចំផែនការផ្លាស់ប្តូរ ដើម្បីនាំយកកីឡាករវ័យ ២១ ឆ្នាំទៅកាន់ Old Trafford នៅរដូវក្តៅនេះ។ Ramos បានស៊ុតបញ្ចូលទីបាន ២៧ គ្រាប់នៅក្នុងការប្រកួតទាំងអស់សម្រាប់ Benfica ក្នុងរដូវកាលនេះ ដោយគ្រាប់បាល់ចំនួន ៧ គ្រាប់ត្រូវបានស៊ុតបញ្ចូលទីក្នុងការបង្ហាញខ្លួន ១៤ លើកក្នុងក្របខ័ណ្ឌ Champions League ទាំងវគ្គជម្រុះ និងវគ្គចែកពូល។ កីឡាករជម្រើសជាតិព័រទុយហ្គាល់រូបនេះក៏អាចរកបាន Hat-trick ដ៏គួរឱ្យភ្ញាក់ផ្អើលផងដែរ អំឡុងពេលឈ្នះ ៦-១ លើប្រទេសស្វីសក្នុងវគ្គ ១៦ ក្រុមចុងក្រោយនៃពានរង្វាន់ World Cup ក្នុងខែធ្នូ កន្លងទៅ បន្ទាប់ពីបានជំនួសតំណែង Cristiano Ronaldo ក្នុងការលេងជម្រើស ១១ នាក់ដំបូងរបស់អ្នកចាត់ការ Fernando Santos ។ Ramos ត្រូវបានគេកំណត់ថាជាជម្រើស សម្រាប់ជំនួសកីឡាករ Harry Kane ដែលជាគោលដៅចម្បងរបស់លោក Erik ten Hag ផងដែរ៕
ប្រភព៖ sportbible.com
