SEA Games 2023៖ ក្រុមកីឡាបាល់បោះជម្រើសជាតិកម្ពុជា បានកក់កៅអីវគ្គពាក់កណ្ដាលផ្ដាច់ព្រ័ត្រ វិញ្ញាសាបុរស ៥នាក់ ទល់ ៥នាក់ នៃព្រឹត្តិការណ៍ស៊ីហ្គេម លើកទី៣២ ហើយ ក្រោយបន្ដយកឈ្នះក្រុមជម្រើសជាតិហ្វីលីពីន ដែលជាម្ចាស់មេដាយមាសស៊ីហ្គេម ១៨ជំនាន់ នៅមជ្ឈមណ្ឌលក្នុងសាលនៃពហុកីឡដ្ឋានជាតិមរតកតេជោ នៅល្ងាចថ្ងៃទី១១ ខែឧសភា ឆ្នាំ២០២៣ នេះ ។ នេះគឺជាប្រកួតទី២ ក្នុងពូលA បន្ទាប់ពីប្រកួតបើឆាកក្រុមបាល់បោះជម្រើសជាតិកម្ពុជា បានយកឈ្នះក្រុមសិង្ហបុរី ដោយលទ្ធផល ៨៥-៦០ពិន្ទុ ។ អ្វីដែលគួរឲ្យភ្ញាក់ផ្អើល គឺក្រុមកម្ពុជា ធ្វើបានកាន់តែល្អ ក្នុងជំនួបជាមួយក្រុមមេដាយមាស ១៨ជំនាន់ ដោយបានយកឈ្នះក្រុមហ្វីលីពីន ក្នុងលទ្ធផល ៧៩-៦៨ពិន្ទុ ដែលនាំឲ្យកម្ពុជា មាន ៤ពិន្ទុពេញ ឈរកំពូលតារាង និងបានកក់កៅអីវគ្គពាក់កណ្ដាលផ្ដាច់ព្រ័ត្រជាស្រេច មុនប្រកួតបញ្ចប់ពូល ជាមួយក្រុមជម្រើសជាតិម៉ាឡេស៊ីស្អែកនេះ៕