បារាំង៖ យោងតាមសារព័ត៌មានក្នុងប្រទេសបារាំង L’Équipe បានឲ្យដឹងថា ក្លឹបបិសាចក្រហម Manchester United និងក្លឹប RB Leipzig កំពុងចាប់អារម្មណ៍ខ្លាំងក្នុងការតាមប្រមាញ់ខ្សែប្រយុទ្ធឆ្នើម Randal Kolo Muani របស់ក្លឹបអ្នកមានបារាំង Paris Saint-Germain។ ខ្សែប្រយុទ្ធសញ្ជាតិបារាំង ដែលមានវ័យ ២៦ឆ្នាំ ត្រូវបានប្រកាសថាលើសតម្រូវការនៅ Parc des Princes នឹងដោយសារគ្រូបង្វឹកលោក Luis Enrique មិនបានរួមបញ្ចូលរូបគេ [Muani] ជាផ្នែកនៃផែនការអនាគតរបស់ក្លឹប។

សូម Subscribe Telegram របស់ Cambosport ដើម្បីទទួលបានព័ត៌មានឆាប់រហ័ស

គួរកត់សម្គាល់ថា Kolo Muani ត្រូវបានទម្លាក់ចេញពីក្រុមមុនពេល PSG ត្រូវលេងប្រឈមនឹងក្រុម Olympique Lyonnais កាលពីល្ងាចថ្ងៃអាទិត្យ បានបង្ហាញយ៉ាងច្បាស់ថាកីឡាករវ័យ២៦ឆ្នាំ មិនមែនស្ថិតនៅក្នុងផែនការរបស់គ្រូបង្វឹកទេ។

អ្នកសារព័ត៌មានលើការផ្ទេរកីឡាករដ៏ល្បីឈ្មោះលោក Fabrizio Romano បានរាយការណ៍​ឲ្យដឹងថា ខ្សែប្រយុទ្ធ Kolo Muani ត្រូវបានអនុញ្ញាតឱ្យចាកចេញពីក្លឹបម្ចាស់ជើងឯក Ligue 1 ក្នុងទីផ្សារដោះដូរកីឡាករនាខែមករាខាងមុខ ដោយក្លឹប PSG ដាក់បន្ទុកលើការធ្លាក់ទម្រង់លេង៕

ប្រភព៖ BBC