អតីតអ្នកចាត់ការទូទៅបណ្តោះអាសន្នលោក Ruud van Nistelrooy ត្រូវបានក្លឹបកញ្ជ្រោងខៀវ Leicester City បង្ហាញការចាប់អារម្មណ៍ទាក់ទងចង់បានគ្រូបង្វឹកសញ្ជាតិហូឡង់រូបនេះមកដឹកនាំក្រុម ពោលគឺបន្ទាប់ពីពួកគេបានសម្រេចចិត្តចែកផ្លូវគ្នាជាមួយអ្នកចាត់ការសញ្ជាតិវែលលោក Steve Cooper កាលពីថ្ងៃអាទិត្យ បន្ទាប់ពីចាញ់ក្រោមថ្វីជើងភ្ញៀវតោខៀវ Chelsea នៅថ្ងៃសៅរ៍។ គួរកត់សម្គាល់ថាលោក Cooper បានចាកចេញពីកីឡដ្ឋាន King Power ក្រោយពីដឹកនាំក្រុមឈ្នះតែពីរប្រកួតប៉ុណ្ណោះក្នុងចំណោម ១២ ប្រកួតនៅរដូវកាលនេះ។

បច្ចុប្បន្នLeicester City កំពុងឈរនៅលេខរៀងទី ១៦ ក្នុងក្របខ័ណ្ឌ Premier League ខិតជិតតំបន់កាត់ចោល ក្រោយមិនទាន់ស្គាល់ឈ្នះសោះ ៤ដងចុងក្រោយ។ ងាកមកវីរបុរសក្រុម Man.Utd សញ្ជាតិហូឡង់ឯណេះវិញ លោក Van Nistelrooy បានទទួលលទ្ធផលជាផ្លែផ្កាទោះបីដឹកនាំក្រុមក្នុងនាមអ្នកចាត់ការបណ្តោះអាសន្ន ប៉ុន្តែរូបលោកបានដើរតួនាទីយ៉ាងសំខាន់ក្រោយពីក្លឹបសម្រេចចិត្តចែកផ្លូវពីមិត្តរួមជាតិគឺលោក Erik ten Hag ក្នុងនោះរូបលោកបានដឹកនាំ Man.Utd ផ្តួលក្រុម Leicester City នៅក្របខណ្ឌ២ផ្សេងគ្នាដល់ទៅ២ដងផងដែរ។

ប្រភព:Leicestermercury