(អារ៉ាប់)៖ បន្ទាប់ពីមានការរំពឹងទុកជាច្រើនខែ វាត្រូវបានគេបញ្ជាក់នៅរសៀលថ្ងៃច័ន្ទនេះថា កីឡាករ Mason Greenwood វ័យ ២១ឆ្នាំ និងក្លឹបបិសាចក្រហម Manchester United បានព្រមព្រៀងគ្នាទៅវិញទៅមកហើយថាសម្រេចចែកផ្លូវគ្នា។ ចាប់តាំងពីថ្ងៃប្រកាសនេះមក Greenwood ត្រូវបានផ្សារភ្ជាប់នូវការចាប់អារម្មណ៍ពីបណ្តាក្លឹបធំៗជាច្រើនមិនថាក្លឹបនៅតំបន់អឺរ៉ុប ឬក៏អាស៊ីឡើយ។ ស្របពេលមានការចាប់អារម្មណ៍ពីសំណាក់ក្លឹបនៅអារ៉ាប៊ីសាអូឌីត Al Ettifaq ដែលមានអ្នកចាត់ការទូទៅលោក Steven Gerrard ដោយពួកគេបានត្រៀមផ្តល់ជូន Greenwood នូវកិច្ចសន្យាដ៏ធំចំនួន ១០លានផោនក្នុងមួយឆ្នាំ។ ក្រៅពីក្លឹប Al Ettifaq នៅមានក្លឹប Roma របស់អ៊ីតាលីនៅលីគ Serie A ក្លឹបយក្សទួរគី Galatasaray និង Istanbul Basaksehir នៅលីគ Super Lig ក៏ចាប់អារម្មណ៍លើ Greenwood ខ្លាំងផងដែរ។ រហូតមកដល់រដូវក្តៅនេះ Al Ettifaq បានចំណាយប្រាក់យ៉ាងច្រើនដើម្បីនាំយក Moussa Dembele, Jack Hendry និងអតីតប្រធានក្រុម Liverpool កីឡាករ Jordan Henderson មានប្រាក់ឈ្នួលប្រមាណ ៧០០,០០០ផោនក្នុងមួយសប្តាហ៍។

ប្រភព៖ The Sun