ក្រុមបាល់ទាត់លីកកំពូលកម្ពុជា Cambodia Premier League ភ្នំពេញក្រោននឹងត្រូវមានបេសកម្មជួបជាមួយនឹងក្រុមមកពីប្រទេសឡាវ Young Elephants ក្នុងការប្រកួត AFC Cup ក្នុងវគ្គជម្រុះបឋម (Preliminary Stage) ដើម្បីស្វែងរកក្រុមដែលអាចឡើងទៅកាន់វគ្គបន្ត។ ថ្លែងក្នុងសន្និសីទសារព័ត៌មានមុនការប្រកួត លោក Oleg Starynskyi គ្រូបង្វឹកភ្នំពេញក្រោនបានលើកឡើងថា ក្រុមខ្លួនបានរង់ចាំការប្រកួតនេះ រយៈពេល ១ឆ្នាំមកហើយ ហើយលោកក៏បានដាក់គោលដៅប្រជែងកៅអីវគ្គបន្ដឲ្យខានតែបានផងដែរ។

លោក Oleg និយាយថា «យើងរង់ចាំការប្រកួតនេះរយៈពេល ១ឆ្នាំ។ នេះគឺជាការប្រកួតដែលយើងចង់លេង ហើយគោលដៅរបស់យើងគឺឡើងទៅលេងវគ្គបន្ត។ ដូច្នេះខ្ញុំគិតថា នឹងក្លាយជាការប្រកួតដ៏ជក់ចិត្ត។ ក្រុមរបស់ពួកគេ (Young Elephants FC) គឺមានកីឡាករចាកចេញមួយចំនួន និងនាំចូលមួយចំនួនដូចគ្នា ប៉ុន្តែប្រព័ន្ធលេងរបស់គេគឺរក្សាដដែល។ ពួកគេគឺជាក្រុមដែលចូលចិត្តគ្រប់គ្រងបាល់ច្រើន ក៏ដូចជាគ្រប់គ្រងការប្រកួតផងដែរ។ ដូច្នេះគឺស្រដៀងនឹងការលេងរបស់យើងដែរ»។