បរទេស៖ មិត្តស្រីរបស់ខ្សែប្រយុទ្ធឆ្នើមគឺ Victor Osimhen អាចនឹងក្លាយជាកូនសោរដ៏សំខាន់នៅក្នុងកិច្ចព្រមព្រៀងការផ្ទេរខ្សែប្រយុទ្ធរូបនេះនៅទីផ្សារដោះដូរកីឡាករខាងមុខ ក្រោយក្លឹបយក្សពីរគឺមួយមកពីប្រទេសអង់គ្លេសគឺ Manchester United និងមួយទៀតមកពីប្រទេសអាល្លីម៉ង់គឺ FC Bayern Munich ដែលបានបង្ហាញការចាប់អារម្មណ៍លើខ្សែប្រយុទ្ធរូបនេះជាខ្លាំង ក្រោយរូបគេអាចរកបាន ២៥គ្រាប់ឲ្យ Napoli និងជាផ្នែកដ៏សំខាន់ដែលអាចជួយឲ្យ Napoli ក្លាយជាម្ចាស់ជើងឯក Serie A រដូវកាលនេះផងដែរ។
យ៉ាងណាមិញមូលហេតុដែលមិត្តស្រីរបស់គេ Stephanie ជាកូនសោរដ៏សំខាន់នៅក្នុងកិច្ចព្រមព្រៀងមួយនេះគឺដោយសារតែនាងគឺកើតនៅក្នុងប្រទេសអាល្លីម៉ង់ ដូច្នេះរូបនាងប្រហែលជាចង់ត្រលប់ទៅរស់នៅក្នុងប្រទេសអាល្លីម៉ង់ ដើម្បីឲ្យកូនស្រីរបស់ពួកគេមានភាពជិតស្និទ្ធិជាមួយនឹងក្រុមគ្រួសាររបស់នាងផងដែរ ។ ទោះបីជាយ៉ាងណាក្តីសមីខ្លួន Osimhern ធ្លាប់បានចេញមកអះអាងថា គេមានក្តីស្រមៃចង់ប្រកបអាជីពនៅឯលីកកំពូលអង់គ្លេស Premier League ដោយគាត់បាននិយាយថា «មនុស្សជាច្រើននៅទូទាំងពិភពលោកចាត់ទុក Premier League ជាលីកល្អបំផុត និងខ្លាំងបំផុត ប៉ុន្តែឥឡូវនេះខ្ញុំស្ថិតនៅក្នុងលីគល្អបំផុតមួយក្នុងពិភពលោក ដែលជាលីគអ៊ីតាលី Serie A។ ខ្ញុំកំពុងធ្វើការយ៉ាងខ្លាំងដើម្បីធ្វើឱ្យប្រាកដថា ខ្ញុំសម្រេចបានក្តីសុបិនរបស់ខ្ញុំក្នុងការលេងនៅ Premier League នៅថ្ងៃណាមួយ ប៉ុន្តែដូចដែលខ្ញុំបាននិយាយ វាជាដំណើរការមួយ ហើយខ្ញុំគ្រាន់តែចង់រក្សាសន្ទុះនេះ ហើយបន្តធ្វើឲ្យបានល្អ»។
