(បរទេស)៖ យោងតាមគេហទំព័រវេបសាយ goal.com បានឲ្យដឹងថា ខ្សែការពារសញ្ជាតិអង់គ្លេស Luke Shaw បាននិយាយបង្ហាញពីគោលដៅមហិច្ឆតាយ៉ាងមុតមាំរបស់ក្លឹបបិសាចក្រហម Manchester United ដើម្បីឈ្នះគ្រប់ការប្រកួតទាំងអស់ក្នុងរដូវកាល ២០២៣/២៤ ខាងមុខនេះ។ Shaw បានបន្ថែមទៀតថា «ខ្ញុំគិតថាពួកយើងទាំងអស់គ្នាពិតជារំភើប… វាតែងតែមានភាពវិជ្ជមាន ហើយជាការពិតណាស់ បន្ទាប់ពីបញ្ចប់រដូវកាលដោយការខកចិត្ត ដោយបរាជ័យក្នុងវគ្គផ្តាច់ព្រ័ត្រ FA Cup ខ្ញុំគិតថាយើងមានអ្វីៗជាច្រើនដើម្បីកែលម្អលើបញ្ហានេះ។ គោលបំណងរបស់យើងតាំងពីដើមរដូវកាលនេះ គឺត្រូវតែឈ្នះរាល់ការប្រកួតទាំងអស់ដែលយើងមាន ហើយខ្ញុំមានអារម្មណ៍ថា ប្រសិនបើយើងបន្តពង្រឹងកម្លាំងបន្ថែមដល់ក្រុមរបស់យើងបានទៀតនោះ ដូច្នេះហេតុអ្វីពួកយើងមិនធ្វើវា?» ។

មិនតែប៉ុណ្ណោះក្លឹប Man Utd នឹងបង្កើតការប្រកួតប្រជែងដ៏ខ្លាំងក្លានៅគ្រប់ការប្រកួតទាំងអស់ ហើយនឹងធ្វើឲ្យក្រុមមានភាពលេចធ្លោ មិនថានៅក្នុងលីគ Premier League និងនៅក្រមខណ្ឌ UEFA Champion League ឡើយ ខណៈក្លឹបបិសាចក្រហមបានចុះហត្ថលេខានាំយកកីឡាករចំណូលថ្មីបានជាច្រើនរូប នាពេលកន្លងទៅថ្មីៗនេះ សម្រាប់ប្រកួតប្រជែងក្នុងកម្រិតខ្ពស់បំផុត៕