ក្រុមបិសាចក្រហម Man. United កំពុងតែខិតជិតក្នុងការផ្ទេរយកកីឡាករ២រូបពីក្លឹប Bayern Munich ខណៈពួកគេទាំងពីរនាក់នោះគឺលេងនៅក្នុងតួនាទីខ្សែការពារទាំងពីរតែម្តង។ គួរបញ្ជាក់ថាកីឡាករទាំងពីរនាក់នោះមានទី១ គឺ Matthijs de Ligt និង ទីពីរគឺ Noussair Mazraoui ខណៈពួកគេទាំងពីរមានតម្លៃខ្លួនមិនលើសពី៥០ លានផោននោះទេ។ ប្រភពពីគេហទំព័រ BBC Sport បានចុះផ្សាយថា ក្លឹបយក្សអាឡឺំម៉ង់Bayern បានទទួលយកការដេញថ្លៃពីក្រុមបិសាចក្រហម Man. United នូវទឹកប្រាក់ប្រមាណ៣៨,៦លានផោន បូករួមតម្លៃ ៤,៣លានផោនទៀតសម្រាប់ខ្សែការពារកណ្តាល និង ជាអតីតប្រធានក្រុម Ajax ដែលធ្លាប់ជួយក្រុមបានឈានដល់វគ្គពាក់កណ្តាលផ្តាច់ព្រ័ត្រ Champions League ក្នុងឆ្នាំ ២០១៩។

ជាមួយគ្នានេះផងដែរក្រុមជើងឯកអង់គ្លេស២០សម័យ គ្រោងចំណាយប្រាក់ ១២,៩លានផោនបន្ថែមទៀត សម្រាប់ខ្សែការពារ Mazraoui ម៉ារ៉ុក វ័យ ២៦ ឆ្នាំ ដើម្បីនាំយកខ្សែការពារស្លាបស្តាំមកជំនួសតំណែង Aaron Wan-Bissaka ដែលត្រៀមផ្លាស់ទៅ West Ham នៅក្នុងពេលឆាប់ៗខាងមុខនេះ។សម្រាប់De Ligt បានផ្ទេរពី Ajax មក Juventus ក្នុងឆ្នាំ ២០១៩ ក្នុងតម្លៃ ៦៧.៥ លានផោន និងបន្ទាប់ពីលើកពាន Serie A និង Coppa Italia ក្នុងការបង្ហាញខ្លួន ១១៧ ប្រកួតគាត់បានផ្លាស់ទៅ ក្នុងឆ្នាំ ២០២២ក្នុងតម្លៃ ៦៥.៦ លានផោន និងលេងបាន ៧៣ប្រកួត ហើយជួយអោយពួកគេលើកពាន Bundesliga នៅឆ្នាំ២០២៣។