(អេស៉្បាញ)៖ ក្លឹបអ្នកមានបុណ្យ Barcelona ត្រូវបានគេរាយការណ៍ថា កំពុងចាប់អារម្មណ៍យ៉ាងខ្លាំងក្នុងការចុះហត្ថលេខាលើខ្សែបម្រើស្លាបរបស់ក្រុមបិសាចក្រហម Manchester United កីឡាករ Antony ខណៈរូបគេកំពុងធ្វើឲ្យអ្នកគាំទ្រនៅកីឡដ្ឋាន Old Trafford ផ្ទុះការរិះគន់ចំពោះទម្រង់លេងជាខ្លាំង។ តាមរយៈ TEAMTalk និងគេហទំព័រ El Nacional រាយការណ៍មកថា កីឡាករប្រេស៊ីលជាគោលដៅផ្ទេរដ៏មានសក្តានុពល ស្របពេលគ្រូបង្វឹកលោក Erik ten Hag ហាក់បង្ហាញការ “មិនសប្បាយចិត្ត” ជាមួយខ្សែបម្រើស្លាបវ័យ ២៣ ឆ្នាំរូបនេះឡើយ។
គួររំលឹកផងដែរថា Antony បានចូលរួមជាមួយ Man United ពី Ajax ក្នុងខែសីហា ឆ្នាំ ២០២២ ក្នុងតម្លៃខ្លួន ៩៥លានអឺរ៉ូ។ Antony គឺជាកីឡាករដែលមានតម្លៃថ្លៃជាងគេទី ២ ក្នុងប្រវត្តិសាស្ត្រក្លឹប។ មិនតែប៉ុណ្ណោះ Antony គ្មានគ្រាប់បាល់ ឬក៏ Assist សោះឡើយក្នុង ២២ ប្រកួតនារដូវកាលនេះ។ ដោយកាលពីរដូវកាលមុន រកបាន ៨គ្រាប់ និង Assist ៣ដងក្នុងចំណោម ៤៤ប្រកួត។ គួរជម្រាបដែរថា Antony នៅសល់កុងត្រារយៈពេល ៣ ឆ្នាំជាមួយបិសាចក្រហម ដែលតម្លៃខ្លួនបច្ចុប្បន្នប្រមាណ ៣៥លានអឺរ៉ូ៕
ប្រភព៖ sportskeeda
