(បរទេស)៖ យោងតាមគេហទំព័រកីឡាករ BBC ចេញផ្សាយនៅថ្ងៃនេះ បានឲ្យដឹងថា លោក Jurgen Klopp ដែលជាអតីតអ្នកចាត់ការទូទៅរបស់ក្លឹបហង្សក្រហម Liverpool ត្រូវបានតែងតាំងជាប្រធានបាល់ទាត់សកលរបស់ក្រុមហ៊ុន Red Bull ដែលពុំមែនជាការងារបង្វឹកកូនក្រុមនៅលើទីលានដូចមុននោះឡើយ។
បុរសវ័យ ៥៧ឆ្នាំ សញ្ជាតិអាល្លឺម៉ង់ នឹងចូលកាន់តួនាទីថ្មីចាប់ពីថ្ងៃទី០១ ខែមករា ឆ្នាំ២០២៥ តទៅ។ ជាមួយគ្នានេះលោក Klopp បានថ្លែងយ៉ាងដូច្នេះថា «ខ្ញុំមិនបានចាប់អារម្មណ៍ក្នុងការងារបង្វឹកទៀតនោះទេ ក្រោយធ្វើការងារនេះជិត ២៥ឆ្នាំរួចមក។ តួនាទីថ្មីនេះ អាចមានការផ្លាស់ប្តូរ ប៉ុន្តែចំណង់ចំណូលចិត្តចំពោះបាល់ទាត់នៅតែមានដដែល»។
គួរបញ្ជាក់ផងដែរថា Red Bull ដែលមានក្លឹបបាល់ទាត់ដូចជា RB Leipzig លេងនៅ Bundesliga, Salzburg លេងនៅអូទ្រីស, New York Red Bulls នៅអាមេរិក និង Bragantino នៅប្រេស៊ីលផងនោះបានឱ្យដឹងថា លោក Klopp នឹងមិនធ្វើការងារជាប់លាប់ជារៀងរាល់ថ្ងៃឡើយ ពោលគឺលោកគ្រាន់តែជាទីប្រឹក្សារបស់ក្រុមផ្សេងៗដែលទាក់ទងទៅនឹងកាយសម្បទា ការទិញដូរកីឡាករ យុទ្ធសាស្រ្ត និងអភិវឌ្ឍន៍ផ្នែកបង្វឹកតែប៉ុណ្ណេាះ៕
ប្រភព៖ BBC
