(អង់គ្លេស)៖ ក្លឹបបិសាចក្រហម Manchester United និងកាំភ្លើងធំ Arsenal ស្ថិតក្នុងចំណោមក្លឹបជាច្រើនដែលចាប់អារម្មណ៍ក្នុងការចុះហត្ថលេខាលើគោលដៅរបស់ក្លឹបមាន់ខ្នាយមាស Tottenham Hotspur គឺខ្សែបម្រើ Sebastian Szymanski របស់ក្លឹប Fenerbahce នេះបើយោងតាមសារព័ត៌មាន TEAMtalk បានរាយការណ៍។

ទន្ទឹមនឹងនេះដែរ ខ្សែបម្រើវ័យ ២៤ឆ្នាំ កំពុងមានរដូវកាលដ៏គួរឱ្យចាប់អារម្មណ៍សម្រាប់ក្លឹបយក្សទួរគី ដោយស៊ុតបញ្ចូលទីបាន ១២គ្រាប់ និងបញ្ជូនបាល់ឱ្យមិត្តរួមក្រុមបានចំនួន ១៤ដង ក្នុងការបង្ហាញខ្លួនសរុបចំនួន ៣៩ប្រកួត នៅគ្រប់ការប្រកួតទាំងអស់។

គួរជម្រាបដែរថា Szymanski បានធ្វើការផ្លាស់ប្តូរទៅកាន់ Fenerbahce ក្នុងតម្លៃប្រហែល ៨.៥លានផោន ខណៈកិច្ចសន្យានឹងផុតកំណត់នៅឆ្នាំ២០២៧ បូកនឹងជម្រើស ១ឆ្នាំ បន្ថែម។ មិនតែប៉ុណ្ណោះ ក្លឹប Fenerbahce នឹងទាមទារតម្លៃខ្លួន Szymanski ប្រមាណ ៣០លានផោន ប្រសិនក្លឹបណាមួយហ៊ានចំណាយលើខ្សែបម្រើរូបនេះ៕

ប្រភព៖ SportsMole