បរទេស៖ គ្រូបង្វឹករបស់ក្លឹបបិសាចក្រហម Manchester United លោក Erik Ten Hag បានទទូចថាគាត់នឹងដោះស្រាយបញ្ហាជាមួយនឹង Marcus Rashford ក្រោយមានពាក្យចរចាមរាមចុងក្រោយពាក់ព័ន្ធនឹងខ្សែប្រយុទ្ធរូបនេះមិនមកហ្វឹកហាត់ជាមួយនឹងមិត្តរួមក្រុម ប៉ុន្តែបែរជាគេឃើញវត្តមាននៅក្នុងក្លឹបកម្សាន្តមួយកន្លែង។ ក្លឹប Man Utd បានយកឈ្នះលើក្រុម Newport County កាលពីយប់ថ្ងៃអាទិត្យ ដើម្បីកោះកៅអីរបស់ខ្លួននៅក្នុងពានរង្វាន់ FA Cup ជុំទី៥។ យ៉ាងណាមិញក្រោយការប្រកួតលោក Erik Ten Hag បានឆ្លើយតបនឹងសំណួរពាក់ព័ន្ធនឹងអវត្តមានរបស់ Marcus Rashford ថា៖ «គាត់បានប្រាប់ក្លឹបថាគាត់ឈឺ វាជាបញ្ហានៅក្នុងក្លឹប ខ្ញុំនឹងដោះស្រាយជាមួយគេ ដូចខ្ញុំនិយាយអញ្ចឹងវាជាបញ្ហានៅក្នុងក្លឹប»។ គួររំលឹកផងដែលថា Marcus Rashford គឺត្រូវបានគេប្រទះឃើញនៅក្នុងក្លឹបកម្សាន្តមួយកន្លែងកាលពីថ្ងៃព្រហស្បត្តិ៍ ខណៈក្លឹប Manchester United បានប្រកាសកាលពីថ្ងៃសុក្រថា ខ្សែប្រយុទ្ធឆ្នើមរបស់ខ្លួនរូបនេះអវត្តមានដោយសារតែបញ្ហាសុខភាពទៅវិញ៕