បរទេស៖ ក្លឹបតោខៀវ Chelsea ត្រូវបានគេរាយការណ៍ថា បានយកឈ្នះលើក្រុមកាំភ្លើងធំ Arsenal ក្នុងការចុះកុងត្រាលើខ្សែប្រយុទ្ធឆ្នើមរបស់ក្លឹប Napoli គឺកីឡាករ Victor Osimhen ។ ខ្សែប្រយុទ្ធឆ្នើមរូបនេះបានបង្ហាញទម្រង់លេងដ៏អស្ចារ្យរបស់ខ្លួនកាលពីរដូវកាលមុន ដោយអាចរកបាន២៦គ្រាប់ ក្នុងបង្ហាញខ្លួន៣២លើកក្នុងក្របខណ្ឌ Serie A និងជួយឲ្យក្រុមក្លាយជាម្ចាស់ជើងឯកលីកជាលើកដំបូងក្នុងរយៈពេល៣៣ឆ្នាំ។ យ៉ាងណាមិញ អ្វីៗនៅរដូវកាលនេះហាក់បីមិនសូវល្អដូចការរំពឹងទុកឡើយ ដោយបច្ចុប្បន្នក្រុម Napoli កំពុងឈរនៅលេខ៩នៃតារាង Serie A ក្រោយលេងបាន៣០ប្រកួត។

ទន្ទឹមពេលដែលក្រុមរបស់ Osimhen កំពុងធ្លាក់ទម្រង់បែបនេះ អនាគតរបស់ Osimhen ត្រូវបានគេយកមកវែកញែក ខណៈកាលពីពេលកន្លងខ្សែប្រយុទ្ធរូបនេះបានបញ្ជាក់ថា រូបគេបានធ្វើការសម្រេចចិត្តរួចហើយនៅទីផ្សាររដូវក្តៅខាងមុខ។ ខ្សែប្រយុទ្ធវ័យ២៥ឆ្នាំរូបនេះកំពុងទទួលបានការចាប់អារម្មណ៍ពីក្រុម Chelsea និង Arsenal ប៉ុន្តែទោះបីជាយ៉ាងណាមិញ បើយោងទៅតាម II Mattino បានចុះផ្សាយថា Chelsea បច្ចុប្បន្នកំពុងមានប្រៀបលើកិច្ចព្រមព្រៀងមួយនេះជាង Arsenal ៕