បរទេស៖ Jadon Sancho អាចនឹងមានលទ្ធភាពនៅក្លឹប Manchester United បានយូរជាងគ្រូបង្វឹកគឺ Ten Hag ក្រោយពីបុរសសញ្ជាតិហូឡង់រូបនេះកំពុងស្ថិតក្នុងសម្ពាធ ក្រោយធ្វើមិនសូវបានល្អឡើយនៅរដូវកាលនេះ។ នៅយប់ថ្ងៃអង្គារ Man Utd បានបរាជ័យក្រោមថ្វីជើងក្រុម Galatasaray ដោយលទ្ធផល ៣-២ ក្នុងពានរង្វាន់ UEFA Champions League ដែលធ្វើកៅអីរបស់លោក Ten Hag ស្ថិតក្នុងកម្តៅជាខ្លាំង ខណៈបច្ចុប្បន្នលោក Erik Ten Hag ត្រូវបានគេរំពឹងថា អាចជាគ្រូបង្វឹកទី២នៅក្របខណ្ឌ Premier League ដែលត្រូវបានក្លឹបបញ្ចប់តំណែងបន្ទាប់ពីលោក Paul Heckingbottom ។

មានរបាយការណ៍នៅក្នុងសប្តាហ៍នេះថា Sancho ទំនងជាអាចចាកចេញពី Old Trafford នៅខែមករា ប្រសិនរូបគេនឹងតែរឹងមិនព្រមសុំទោសទៅកាន់គ្រូបង្វឹកគឺលោក Erik Ten Hag ។ ជាមួយនឹងទម្រង់លេងបច្ចុប្បន្នរបស់ Man Utd លោក Ten Hag អាចនឹងត្រូវធ្វើគ្រប់បែបយ៉ាងដើម្បីស្រោចស្រង់តំណែងរបស់ ព្រោះបើមិនដូច្នោះទេក្លឹប Man Utd អាចនឹងសម្រេចចិត្តបញ្ចប់តំណែងរបស់លោកតែម្តង ។