(អង់គ្លេស)៖ យោងតាមកាសែត Daily Mail បានឲ្យដឹងថា ខណៈពេលនេះក្លឹប Tottenham Hotspur កំពុងរៀបចំដេញថ្លៃសម្រាប់ខ្សែប្រយុទ្ធ Brennan Johnson របស់ក្លឹប Nottingham Forest ដែលមានតម្លៃប្រមាណ ៥០លានផោន។ Johnson ត្រូវបានគេជឿជាក់ថា ចង់ទៅចូលរួមជាមួយ Spurs ជាជាង Chelsea ប្រសិនបើមានឱកាស មិនតែប៉ុណ្ណោះ Spurs អាចនឹងដោះដូរកីឡាករ Davinson Sanchez របស់ខ្លួនជាថ្នូរបូករួមនិងសាច់ប្រាក់ ដើម្បីឲ្យកិច្ចព្រមព្រៀងនេះទៅបានដោយរលូន ខណៈភាគីទាំងសងខាងមិនទាន់យល់ព្រមគ្នា១០០ភាគរយនៅឡើយទេ។ កីឡាករវ័យ ២២ឆ្នាំរូបនេះ បានស្ថិតក្នុងទម្រង់លេងដ៏គួរឱ្យចាប់អារម្មណ៍សម្រាប់ក្រុមហង្សក្រហមក្នុងអំឡុងយុទ្ធនាការឆ្នាំ ២០២២/២៣ ដោយស៊ុតបញ្ចូលទីបាន ១០គ្រាប់ និងបញ្ជូនបាល់ឱ្យមិត្តរួមក្រុមចំនួន ៣លើក ក្នុងការបង្ហាញខ្លួន ៤៤ដងក្នុងការប្រកួតទាំងអស់។ ក្រុមរបស់លោក Ange Postecoglou ដែលបានយកឈ្នះទៅលើ Man United ២:០ ក្នុងលីគកាលពីថ្ងៃសៅរ៍ បានចុះហត្ថលេខាលើ James Maddison, Pedro Porro, Micky van de Ven, Dejan Kulusevski, Guglielmo Vicario, Alejo Veliz, Ashley Phillips និង Manor Solomon ក្នុងអំឡុងពេលទីផ្សារផ្ទេរដ៏មមាញឹក៕
