មហាសេដ្ឋី Elon Musk ដែលជាម្ចាស់ SpaceX បានចាប់ផ្ដើមហាត់ក្បាច់គុនចម្រុះ MMA ជាមួយនឹង Lex Fridman ម្ចាស់ខ្សែក្រវាត់ខ្មៅ Jujutsu (ជូជិតស៊ូ) ដើម្បីត្រៀមខ្លួនសម្រាប់ការឡើងសង្វៀនប្រកួតជាមួយម្ចាស់ Facebook គឺមហាសេដ្ឋី Mark Zuckerberg។
សូម Subscribe Telegram របស់ Cambosport ដើម្បីទទួលបានព័ត៌មានឆាប់រហ័ស
«ខ្ញុំបានចាប់ផ្ដើមការហ្វឹកហាត់ប្រកបដោយការរីករាយតាមធម្មតាជាមួយ Elon Musk ក្នុងរយៈពេលច្រើនម៉ោងកាលពីម្សិលមិញ» Lex Fridman ម្ចាស់ឆានែល Lex Fridman Podcast និងជាម្ចាស់ខ្សែក្រវាត់ខ្មៅគុនជូជិតស៊ូ បានសរសេរលើ Twitter កាលពីថ្ងៃទី 28 មិថុនាដូច្នេះ។
លោក Fridman បន្តថា «ពិតជាគួរឱ្យចាប់អារម្មណ៍ចំពោះកម្លាំង និងសមត្ថភាពរបស់គាត់ ទាំងនៅលើជើងទាំងពីរ ទាំងនៅលើដី»។
Fridman ក៏បានបង្ហោះរូបថតពីរសន្លឹកដែលថតបានទិដ្ឋភាព Musk ក្រៀកជាប់ក និងសង្កត់ដៃរបស់ Fridman ហើយផ្ដួលគូប្រកួតបានយ៉ាងស្រួល។
«ពិតជាចាប់អារម្មណ៍នៅពេលឃើញ Elon និង Mark ហាត់ក្បាច់គុន។ ប៉ុន្តែខ្ញុំគិតថា ពិភពលោកនឹងទទួលបានការបម្រើច្រើនជាងនេះនៅពេលពួកគេហាត់គុន ដោយមិនវាយគ្នាក្នុងទ្រុងដែក។ ទោះជាមានរឿងអ្វីកើតឡើង ខ្ញុំនៅតែគាំទ្រពួកគេ» Fridman និយាយដូច្នេះ។
កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។
អ្នកគាំទ្រកំពុងតែទន្ទឹងរង់ចាំ និងនាំគ្នាភ្នាល់ ដោយមានការចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕
