(ឡុងដ៏)៖ ក្លិប Liverpool ស្ថិតក្នុងទីផ្សារដោះដូរកីឡាករនេះ បានសម្រេចការផ្ទេរយកខ្សែបម្រើ Dominik Szoboszlai ពីក្លិប RB Leipzig នៅក្នុងតម្លៃ ៦០លានផោន ដែលមានកិច្ចសន្យាលេងនៅលីគអង់គ្លេស Premier League រយៈពេល ៥ឆ្នាំ។ នេះបើតាមប្រភពពី BBC ឲ្យដឹងនាថ្ងៃទី០៣ ខែកក្កដា ឆ្នាំ២០២៣។ នេះជាការយកបានសមាជិកថ្មីទីរបស់ក្លិបហង្សក្រហម Liverpool ស្ថិតក្រោមការដឹកនាំដោយលោក Jurgen Klopp នាទីផ្សារដោះដូររដូវក្តៅនេះ ដោយបានចំណាយ ៦០លានផោនចំពោះកីឡាករហុងគ្រី Dominik និងចំនួន ៣៥លានផោន យកបានខ្សែបម្រើអាហ្សង់ទីន Mac Allister។ រំលឹកផងថា សម្រាប់រដូវកាលមុន២០២២-២៣ ក្លិប Liverpool បានបញ្ចាប់នៅចំណាត់ថ្នាក់លេង៥ មានត្រឹមឱកាលលេងវគ្គជម្រុះពានលីគទី២ អឺរ៉ុប Europa League 2023-24 ខណៈសមាជិកថ្មីមានវ័យ ២២ឆ្នាំ Dominik ក៏ជាកីឡាករម្នាក់ដែលបានរួមចំណែកជួយក្លិប RB Leipzig ឈ្នះពាន German Cup ចំនួន ២រដូវកាល។

រូបគេក៏បានលើកឡើងថា «វាជាក្លិបប្រវត្តិសាស្ត្រ ជាមួយកីឡាករល្អ និងគ្រូបង្វឹកល្អ សម្រាប់ខ្ញុំ វាល្អឥតខ្ចោះក្នុងការឈានទៅជំហានបន្ទាប់ជាមួយក្លិបបែបនេះ ហើយអ្នកគាំទ្រ កីឡដ្ឋាន និងអ្វីគ្រប់យ៉ាងគឺពិងជាល្អណាស់»។ សម្រាប់ក្លិប Liverpool នារដូវកាលថ្មី នៃជំនួបដំបូងសប្តាហ៍ទី១ គឺត្រូវប៉ះក្លិប Chelsea៕