បរទេស៖ Roberto Firmino រកបានមួយគ្រាប់ចុងម៉ោង ខណៈដែល Liverpool បានតាមស្មើក្រុមកំពូលតារាង Arsenal ក្នុងលទ្ធផលស្មើ 2-2 ក្នុងការប្រកួតដ៏រំភើបកាលពីថ្ងៃអាទិត្យនៅកីឡដ្ឋាន Anfield ។
គ្រាប់បាល់របស់ Gabriel Martinelli និង Gabriel Jesus បានបញ្ជូនឱ្យក្រុមកាំភ្លើងធំបាននាំមុខពីរគ្រាប់ក្នុងនាទី 28 មុនពេល Mohamed Salah ស៊ុតបញ្ចូលទីឱ្យ Liverpool ភ្លាមៗមុនពេលចប់តង់ទីមួយ។ Salah បានខកខានការស៊ុតបាល់ប៉េណាល់ទីនៅតង់ទីពីរសម្រាប់ក្រុមហង្សក្រហម ប៉ុន្តែក្រុមម្ចាស់ផ្ទះបានតាមស្មើវិញនៅនាទីទី 87 តាមរយៈកីឡាករ Firmino ដែលបានស៊ុតទៅលើអ្នកចាំទី Aaron Ramsdale នៅចុងម៉ោង។
ការនាំមុខរបស់ Arsenal លើក្រុមលេខ 2 Manchester City ក្នុងតារាងឥឡូវនេះមាន 6 ពិន្ទុ ខណៈដែលក្រុមរបស់លោក Pep Guardiola មានមួយប្រកួតក្នុងដៃ ខណៈដែល Liverpool បន្តនៅលេខ 8 មាន 12 ពិន្ទុតាមពីក្រោយក្រុមលេខ 4 Manchester United ក្នុងការប្រជែងដណ្តើមយកពានរង្វាន់ក្របខ័ណ្ឌ Champions League សម្រាប់អាណត្តិក្រោយ។
