ប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ សម្ដេចពិជ័យសេនា ទៀ បាញ់ បានដឹកនាំគណៈកម្មាធិការជាតិ ដើម្បីចុះត្រួតពិនិត្យហេដ្ឋារចនាសម្ព័ន្ធពហុកីឡដ្ឋានជាតិ ដែលជាទីតាំងដែលត្រូវបម្រើដល់ការប្រកួតក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ។

   សម្ដេចពិជ័យសេនា បានវាយតម្លៃខ្ពស់ចំពោះការងារជួសជុលនៃទីលានប្រកួតនានាក្នុងពហុកីឡដ្ឋានជាតិអូឡាំពិក ដែលសម្រេចបានស្ទើរតែរួចរាល់ទាំងស្រុងហើយ ខណៈនៅសល់តែការកែលម្អ និងតុបតែងបន្ថែមទៀតប៉ុណ្ណោះដើម្បីធានាបានសម្រាប់ការប្រកួតដែលនឹងចូលមកដល់នាពេលដ៏ខ្លីខាងមុខ។ ចំពោះពហុកីឡដ្ឋានជាតិអូឡាំពិក នឹងត្រូវបម្រើដល់ការប្រកួតចំនួន ៩ប្រភេទកីឡា ក្នុងនោះរួមមាន បាល់ទាត់បុរស (ពូល A), បាល់ទះ, បាល់ទឹក, កាយសម្ព័ន្ធ, ប៉េតង់, សីដក់, សូហ្វតិន្និស, លើកទម្ងន់ និងកីឡារាំ។