ខ្សែជីវិត ពិតរបស់អាជ្ញា កណ្ដាលយូដូ អន្តរជាតិ ឡាច វុទ្ធី

កីឡាផ្សេងៗ 8 years ago 137 Views

ការប្រឡូកក្នុងកីឡាយូដូ

នៅឆ្នាំ១៩៨៣ លោក ឡាច វុទ្ធីបានចាប់ផ្ដើមហ្វឹកហាត់នៅម្ដុំអាងហែលទឹកនៃពហុកីឡដ្ឋានជាតិ រហូតដល់ឆ្នាំ១៩៨៤ លោកបានចូលហ្វឹកហាត់កីឡា SAMBO ជាមួយលោកសញ្ជាតិរុស្សី។ កីឡានេះដូចទៅនឹងកីឡាយូដូដែរពីព្រោះក្បាច់ស្រដៀងគ្នា។ ក្នុងឆ្នាំ១៩៨៦-១៩៩១ លោកបានទៅបំពេញកិច្ចការនៅប្រទេសវៀតណាមដោយផ្អាកការហាត់ យូដូមួយរយៈរហូតដល់ឆ្នាំ១៩៩១។ ចុងឆ្នាំ១៩៩១ទើបលោកអាចបន្តការហ្វឹកហាត់វិញក្រោយពី ត្រឡប់ពីប្រទេសវៀតណាម។ ក្រោយពីបានខិតខំប្រឹងប្រែងហ្វឹកហាត់មិនខ្លាចនឿយហត់ លោកត្រូវបានកោះហៅឲ្យចូលលេងក្នុងក្រុមជម្រើសជាតិក្នុងឆ្នាំ ១៩៩២។

លោកឡាច វុទ្ធី ធ្វើជាអាជ្ញាកណ្ដាលយូដូអន្តរជាតិនៅក្រៅប្រទេសកន្លងមក

ដល់ ឆ្នាំ ១៩៩៧ លោកបានចេញដំណើរទៅហ្វឹកហាត់នៅទីក្រុង Chiba នៃប្រទេស ជប៉ុនរយៈ៦ខែតាមរយៈអង្គការ JICA។ ឆ្នាំ១៩៩៨លោកបានទៅចូលរួមសិក្ខាសាលាយូដូមួយខែនៅ វិទ្យាស្ថានយូដូ Kodokanនៃប្រទេសជប៉ុននិងបានប្រឡងជាប់ខ្សែក្រវាត់ខ្មៅ២ដាន់ នៅទីនោះ។ នៅ ឆ្នាំ១៩៩៩ លោកបានចេញដំណើរទៅហ្វឹកហាត់យូដូនៅទីក្រុង Osakប្រទេសជប៉ុនទៀតបន្ទាប់ពីទទួលបានខ្សែក្រវាត់ខ្មៅ២ដាន់។ ដោយសារតែការតស៊ូគួបផ្សំនឹងទេពកោសល្យមិនអាចខ្វះបាន លោកបានប្រលងជាប់ខ្សែក្រវាត់ខ្មៅ៣ដាន់។ កាន់តែអស្ចារ្យជាងនោះទៅទៀតលោកបានប្រលងជាប់ខ្សែក្រវាត់ខ្មៅ ៤ដាន់ក្នុងឆ្នាំ២០០៧។

អាជីពជាគ្រូបង្វឹក
លោកបានចាប់ផ្ដើមបង្ហាត់យូដូតាំងពីឆ្នាំ១៩៩៧ ពោលគឺ ហ្វឹកហាត់ខ្លួនឯងផងនិងបង្ហាត់កូនសិស្សផង។ ការបង្វឹកបង្ហាត់នេះគឺផ្ដើមដំបូងនៅក្នុងក្លិបយូដូអូឡាំពិក រហូតដល់បច្ចុប្បន្ន។ ជាមួយគ្នានោះដែរ លោកបានបង្ហាត់កីឡាយូដូនៅសាលាបារាំង Lycee De Cart (លីហ្សេដេកាត)តាំងពីឆ្នាំ២០០៣រហូតដល់បច្ចុប្បន្នដែរ។ បច្ចុប្បន្នលោកក៏ជាគ្រូបង្វឹកកីឡាយូដូក្រៅម៉ោងនៅសាលា “I Can” តាំងពីឆ្នាំ២០០៤ រហូតដល់ពេលនេះដែរ។ លោកបានបញ្ជាក់ថាលោកមានកូនសិស្សប្រហែលជាជាង៥០០នាក់ហើយចាប់ តាំងពីឆ្នាំ១៩៩៧មក។

លោក ឡាច វុទ្ធី កាលទៅហ្វឹកហាត់កីឡាយូដូនៅប្រទេសចិនកន្លងមក

ស្នាដៃទទួលបាន

លោកគឺជាកីឡាករយូដូឆ្នើមនៅក្នុងប្រទេសកម្ពុជាដោយជាប់លំដាប់ ថ្នាក់លេខ១តាំងពីឆ្នាំ១៩៩១ ពោលក្នុងអំឡុងពេលដែលលោកមិនទាន់ចូលបម្រើការងារនៅក្នុងខេមរៈ សហព័ន្ធ។ លោកដឹកនាំកីឡាយូដូតាំងពីឆ្នាំ១៩៩៨មក ដែលក្នុងនោះធ្លាប់ទទួលបានមេដាយសរុប២១ ក្នុងនោះ មេដាយ មាសពីរ ប្រាក់៥ និងសំរឹទ្ធ១៤។ លោកបានដឹកនាំកីឡាយូដូកម្ពុជាទៅចូលរួមប្រកួតជាលក្ខណៈអន្តរជាតិនៅប្រទេសឡាវ វៀតណាម និងការប្រកួតស៊ីហ្គេម។ ខែ សីហាឆ្នាំ២០១០ លោកបានដឹកនាំកីឡាការិនី សំ សុធាទៅចូលរួមប្រកួតកីឡាអូឡាំពិកយុវជនពិភពលោក(Olympic Youth Game2011)នៅប្រទេសសិង្ហបុរី។ ជាលទ្ធផល សំ សុធាទទួលបានមេដាយសំរឹទ្ធជូនជាតិមាតុភូមិវិញក្នុងចំយុវជនមក ពីប្រទេសចំនួន២០៥។ ក្រៅពីនេះ លោកបានចូលរួមរៀបចំការប្រកួតយូដូជើងឯកអាស៊ីអាគ្នេយ៍កាល ឆ្នាំ២០០៦។

ក្លាយជាអគ្គលេខាធិការ

ក្នុងឆ្នាំ២០០០លោកបានចូលបម្រើការងារក្នុងខេមរៈសហព័ន្ធកីឡា យូដូដែលមានតួនាទីជានាយកបច្ចេក ទេស។ កិច្ចខិតប្រឹងប្រែងនិងសមត្ថភាពរបស់លោកត្រូវបានបង្ហាញយ៉ាង ច្បាស់ដោយត្រូវបានតែងតាំងជា អគ្គលេខាធិការរងក្នុងឆ្នាំ២០០២។កាន់តែមានភាពលេចធ្លោពីមួយថ្ងៃទៅមួយថ្ងៃដោយកើតចេញពីបទពិសោ ធន៍ និងការងារ លោកបានក្លាយជាអគ្គលេខាធិការតែម្ដងក្រោយពីការបោះឆ្នោតក្នុង ឆ្នាំ២០០៤។ លោកឡាច វុទ្ធីបានចូលបម្រើការងារជានាយកបច្ចេកទេសនៅក្នុងខេមរៈសហព័ន្ធកីឡាយូដូកម្ពុជាតាំងពីឆ្នាំ២០០០។ បន្ទាប់មកទៀតលោកបានជាប់ឆ្នោត ជាអគ្គលេខាធិការ នៅក្នុងខេមរៈសហព័ន្ធកីឡាយូដូក្នុងឆ្នាំ២០០២ រហូតដល់បច្ចុប្បន្ន។

ការដឹកនាំកីឡាករចេញទៅប្រកួតនៅក្រៅប្រទេសនាពេលកន្លងមក

អ្វីដែលគួរឲ្យកោតសរសើរនោះគឺលោកបានប្រឡងជាប់ជាអាជ្ញា កណ្ដាលយូដូអន្តរជាតិIJF(International Judo Federation)ក្នុងឆ្នាំ២០០៣នៅប្រទេសវៀតណាម។ លោកបានចេញទៅធ្វើជាអាជ្ញាកណ្ដាលនៅក្នុងព្រឹត្តិការណ៍កីឡា ស៊ីហ្គេមនិងអន្តរជាតិជាច្រើនដង។ លើសពីនេះទៅទៀត លោកបានចេញទៅហ្វឹកហាត់នៅឯបរទេសជាញឹកញាប់ជាពិសេសប្រទេស ជប៉ុន។ ឆ្នាំ២០០៣ ២០០៥ ២០០៧ ២០០៩ លោកបានចេញធ្វើជាអាជ្ញាកណ្ដាល ស៊ីហ្គេម (SEA GAMES)និងអាជ្ញាកណ្ដាលថ្នាក់ជាតិរួមនឹងអន្តរជាតិជាច្រើន ទៀត។

ជីវិតផ្ទាល់ខ្លួន

លោក ឡាច វុទ្ធីកើតថ្ងៃទី៣០ ខែធ្នូឆ្នាំ១៩៦៨នៅសង្កាត់លេខ៣ រាជធានីភ្នំពេញ។ លោកមានបង
ប្អូន៨នាក់ក្នុងនោះស្រី៤ នាក់ប្រុស៤នាក់។ លោកគឺជាកូនទី៣នៅក្នុងក្រុមគ្រួសារដែលមានលោកឳពុក ឈ្មោះ ឡាច សេងសាននិងម្ដាយឈ្មោះ តាន់ លីណា។

ការសិក្សា

មុនដល់ឆ្នាំ១៩៧៥ លោកបានសិក្សាត្រឹមថ្នាក់ទី៣ (ត្រូវនឹងថ្នាក់ទី៩ពីដើម)ប៉ុណ្ណោះនៅសាលាភ្នំដូនពេញ (បច្ចុប្បន្នសាលាស៊ីសុវត្ថិ) តែចូលរៀននៅថ្នាក់ទី៨នៅឆ្នាំ១៩៨១នៅសាលាដដែល។ ការចូលរៀនថ្នាក់ទី៨នេះគឺផ្លោះរហូតដល់៥ថ្នាក់។ កាលនោះ លោកគ្រូក៏អនុញ្ញាតឲ្យលោកចូលរៀនដោយសារតែលោកពូកែមុខវិជ្ជា គណិតវិទ្យាស្រាប់ ហើយការរៀននៅក្នុងថ្នាក់ទៀតសោតក៏មិនចាញ់អ្នកឡើងថ្នាក់ តាមលំដាប់លំដោយដែរ។ ក្រោយមកលោកបានប្រលងជាប់ មធ្យមសិក្សាទុតិយភូមិ(BacII)នៅក្នុងឆ្នាំ១៩៨៤។ ក្រោយបញ្ចប់ការសិក្សា លោកបានចូលបម្រើការងារជាមន្ត្រីប៉ូលិសនៅក្រសួងមហាផ្ទៃដល់ បច្ចុប្បន្ន។

ការជម្លៀសខ្លួន

នៅក្នុងឆ្នាំ១៩៧៥ គ្រួសាររបស់លោកត្រូវបានជម្លៀសទៅកាន់ទឹកដីស្រុក លើកដែក ខេត្តកណ្ដាលដោយសាររបបខ្មៅងងឹត ប៉ុលពត។ លោក ឡាច វុទ្ធីសុំមិនរំលឹកពីរបបប្រល័យពូជសាសន៍នេះទេ តែលោកគ្រាន់តែនិយាយថាគឺគ្មានអ្នកណាម្នាក់រស់ដោយស្រួលនោះឡើយក្នុងគ្រានោះ។ នៅឆ្នាំ១៩៧៩ លោក នឹងក្រុមគ្រួសារបានត្រឡប់មកទីក្រុងភ្នំពេញវិញដោយចាប់ យកផ្ទះនៅផ្ដុំផ្សារចាស់ពីព្រោះមិនសូវជាមានមនុស្សរស់ នៅច្រើនកាលជំនាន់នោះ។ ដូច្នេះលោកអាចចាប់យកផ្ទះដើម្បីរស់នៅបាន។ លោករំលឹកដែរថាលោកមានអាយុប្រហែលជា៧ឆ្នាំប៉ុណ្ណោះ។ លោកបានបញ្ជាក់ថា ដោយសំណាងល្អ សមាជិកគ្រួសាររបស់លោកគ្មានអ្នកណាម្នាក់ស្លាប់ក្នុងបនប្រល័យ ពូជសាសន៍នោះឡើយ។

គោលបំណងទៅថ្ងៃអនាគត

ក្នុងនាមជាអគ្គលេខាធិការខេមរៈសហព័ន្ធកីឡាយូដូ និងគ្រូបង្វឹកកីឡាយូដូ លោកឡាច វុទ្ធីបានអះអាងថាលោកនឹងបន្តកិច្ចខំប្រឹងថែមទៀតដើម្បី ធ្វើយ៉ាងណាឲ្យកីឡាយូដូដែលមានប្រភពមកពីប្រទេសជប៉ុននេះ កាន់តែរីកចម្រើនទៅមុខនៅកម្ពុជា។ ជាពិសេសការបង្កើតទំនាក់ទំនងជាមួយសហព័ន្ធកីឡាយូដូអន្តរជាតិ បន្ថែមលើការសម្រេចបានជោគជ័យនាពេលកន្លងមក។ មួយវិញទៀត លោកនឹងព្យាយាមផ្សព្វផ្សាយឲ្យប្រជាពលរដ្ឋបានជ្រាប “កីឡាយូដូជួយដល់សុខភាពប្រចាំថ្ងៃ”។ លើសពីនេះក្បាច់គុនអាចជួយការពារខ្លួននិងបង្ការការគ្រោះ ថ្នាក់ផ្សេងៗ៕

ការ៉ាតេដូ

Recent Posts