ត្រឹមតែរយៈពេល ២សប្តាហ៏ប៉ុណ្ណោះក្រុម Borussia Dortmund បានសម្រេច​ចែក​ផ្លូវគ្នា​ជាមួយ​អ្នក​ចាត់​ការទូទៅលោក Edin Terzic បន្ទាប់​ពីសាម៉ីខ្លួនបានស្នើសុំក្លឹបបញ្ចប់​កុងត្រា​ ​ភ្លាមៗដោយមិនមានការគ្រោងទុក។គួររំលឹកថាគ្រូបង្វឹកសញ្ជាតិអាឡឺម៉ង់បានដឹកនាំក្រុមឈានដល់វគ្គផ្តាច់ព្រ័ត្រ Champions League និងបានត្រឹមជើងឯករងប៉ុណ្ណោះ។នៅក្នុងសេចក្តីថ្លែងការជាផ្លូវការណ៏ថាៈ ក្លឹបអាល្លឺម៉ង់បានយល់ព្រមតាមសំណើរបស់លោក Terzic បន្ទាប់ពី ការពិភាក្សារួមគ្នា និងជាមួយគ្រូបង្វឹកវ័យ៤១ឆ្នាំរូបនេះ។

Terzic បានចាប់ផ្តើមអាជីពជាគ្រូបង្វឹកយុវជនថ្នាលក្លឹប Dortmund ចន្លោះឆ្នាំ ២០១០ និង ២០១៣ មុនពេលក្លាយជាជំនួយការរបស់លោក Slaven Bilic នៅក្លឹបទួរគី Besiktas ។គាត់ក៏បានដើរតាមបុរសដើមកំណើតយូហ្គូស្លាវី Bilic ទៅបង្វឹកក្រុម West Ham នៅ Premier League ក្នុងឆ្នាំ ២០១៥ ប៉ុន្តែបានចែកផ្លូវគ្នាក្រោយពីក្រុមញញួរធំបានបណ្តេញលោក Bilic  ក្នុងខែវិច្ឆិកា ឆ្នាំ ២០១៧។  ហើយទីបំផុត  Terzic បានសម្រេចចូលរួមជាមួយ Dortmund ម្តងទៀតក្នុងនាមជាជំនួយការរបស់លោក Lucien Favre នៅឆ្នាំបន្ទាប់។

ទោះយ៉ាងណាបន្ទាប់ពីការបណ្តេញលោក Favre ក្នុងខែធ្នូ ឆ្នាំ ២០២០ លោក Terzic ត្រូវបានតែងតាំងជាគ្រូបង្វឹកបណ្តោះអាសន្នរហូតដល់ចុងបញ្ចប់នៃរដូវកាលនោះ និងបានឈ្នះពាន German Cup ក្រោយជ័យជំនះលើក្រុម RB Leipzig  និងក្រោយមកទៀតរូបលោកបានចូលកាន់តួនាទីជានាយកបច្ចេកទេសរបស់ក្លឹប មុនពេលក្លាយជាគ្រូបង្វឹកពេញសិទ្ធិ របស់ពួកគេនៅឆ្នាំ ២០២២។ សម្រាប់រដូវកាលចាស់ Dortmund បញ្ចប់ក្នុងចំណាត់ថ្នាក់លេខ ៥ ប៉ុន្តែមានកៅអីលេងនៅក្របខណ្ឌ Uefa Champion League រដូវកាលថ្មី។

ប្រភពៈBBC