(អង់គ្លេស)៖ ក្លឹបយក្សនៅបារាំង Paris Saint-Germain ត្រូវ​បាន​គេ​រាយការណ៍មក​ថា​ បាន​ត្រៀម​ខ្លួនផ្តល់​ទឹកប្រាក់​ដេញថ្លៃជាង ១៤០លាន​អឺរ៉ូ ឬស្មើនឹង ១២០លាន​ផោន សម្រាប់ដោះដូរទិញយក​ខ្សែ​បម្រើ​ស្លាប ​Bukayo Saka របស់ក្រុមកាំភ្លើងធំ Arsenal នា​រដូវ​ក្ដៅ​ខាងមុខ។

ក្លឹបយក្សនៅ Ligue ១ កំពុងរៀបចំបញ្ជីនៃគោលដៅវាយប្រហារមុនយុទ្ធនាការ ២០២៤-២៥ មកដល់ ខណៈដែលក្លឹបនឹងសម្របខ្លួនលេងដោយគ្មាន Kylian Mbappe នៅរដូវកាលក្រោយ។ ជាក់ស្តែង កាលពីខែមុន Mbappe បានជូនដំណឹងដល់ PSG ជុំវិញការចង់ចាកចេញពី Parc des Prince នៅពេលដែលកិច្ចសន្យាផុតកំណត់។

យ៉ាងណាមិញតាមកាសែត ​​Fichajes បានឲ្យដឹងថា PSG បានកំណត់អត្តសញ្ញាណលើខ្សែបម្រើស្លាប Saka ជាអ្នកជំនួសតំបន់ប្រយុទ្ធ Mbappe នៅរដ្ឋធានីបារាំង។ គួរជម្រាបផងដែរថា កីឡាករលេខ៧ របស់ Arsenal បានចុះហត្ថលេខាលើកិច្ចសន្យារយៈពេលវែងថ្មីជាមួយក្លឹបកាលពីខែឧសភាឆ្នាំមុន ខណៈកុងត្រាផុតកំណត់រហូតដល់ឆ្នាំ ២០២៧៕