កម្ពុជា៖ ក្លឹបព្រះខ័ណ្ឌរាជស្វាយរៀងបានប្រកាសនៅថ្ងៃទី០១ខែវិចិ្ចកាឆ្នាំ២០២៣ម្សិលមិញនេះថា ពួកគេនឹងមិនយល់ស្របចំពោះការសម្រេចចិត្តដាក់ពិន័យរបស់សហព័ន្ធលើកីឡាករ Gabriel Silva Costa ឡើយ ក្រោយពីខ្សែប្រយុទ្ធរូបនេះបានបង្ហាញនូវអាវក្នុងរបស់ខ្លួនដែលមានពាក្យ “100% Jesus” ក្រោយរូបគេទាត់បញ្ជូនទីលើក្រុមបឹងកេត។ យ៉ាងណាមិញបើយោងទៅតាមសេចក្តីថ្លែការណ៍របស់ក្លឹបព្រះខ័ណ្ឌរាជស្វាយរៀងបានសរសេរថា៖ «សេចក្តីថ្លែងការណ៍ផ្លូវការ បន្ទាប់ពីមានការចេញ លិខិតពិន័យ កាលពីថ្ងៃទី៣១ ខែតុលា ឆ្នាំ២០២៣ ដោយសហព័ន្ធកីឡាបាល់ទាត់ជាតិកម្ពុជា (FFC) និងការដាក់ពិន័យជាបន្តបន្ទាប់មកលើកីឡាករ Gabriel Silva Costa។ ក្លឹបសូមប្រកាសជាផ្លូវការថា ក្លឹបមិនទទួលយកការសម្រេចនេះឡើយ ដោយហេតុផលថា យើងជឿលើ Gabriel ថាគាត់មិនមានបំណងបញ្ចេញនូវពាក្យសំដីរើសអើង ឬធ្វើឱ្យនរណាម្នាក់អាក់អន់ចិត្តជាមួយនឹងពាក្យស្លោកនៅលើអាវខាងក្នុង របស់គាត់ឡើយ ដែលជាហេតុផលឈានទៅដល់ FFCដាក់ពិន័យដូច្នេះ ដោយគ្រាន់តែយោងទៅតាមមាត្រាដូចដែលបានរៀបរាប់នៅក្នុងលិខិតវិន័យនោះទេ។
