(អេស៉្បាញ)៖ យោងតាមសារព័ត៌មានកីឡា BBC បានឲ្យដឹងថា ខ្សែបម្រើឆ្នើម Luka Modric របស់ក្លឹបអធិរាជស Real Madrid ត្រូវបានក្រុមជម្រើសជាតិក្រូអាតកោះហៅ សម្រាប់ការប្រកួតបើកឆាកយុទ្ធនាការពានរង្វាន់ UEFA Nations League។

ទន្ទឹមនឹងនេះ Modric ដែលជាប្រធានក្រុម Real Madrid នឹងបានឈានចូលដល់វ័យ ៣៩ឆ្នាំ នៅខែកញ្ញាខាងមុខនោះ បានបង្ហាញខ្លួន ១៧៨លើក សម្រាប់ក្រុមជម្រើសជាតិ ដោយបានបង្ហាញខ្លួនលើកដំបូង ក្នុងវ័យ ២០ឆ្នាំកាលពីឆ្នាំ២០០៦។ បន្ទាប់ពីការធ្លាក់ចេញរបស់ក្រូអាត នៅវគ្គសន្សំពិន្ទុតាមពូលនៃព្រឹត្តិការណ៍ Euro ២០២៤ នោះ មានមន្ទិលសង្ស័យថាតើ Modric អាចនឹងបន្តការលេងឱ្យក្រុមជម្រើសជាតិតទៅទៀត ឬយ៉ាងណា?

គួរបញ្ជាក់ដែរថា ក្រូអាត នឹងត្រូវទៅជួបព័រទុយហ្គាល់ នៅថ្ងៃទី០៥ ខែកញ្ញាខាងមុខ សម្រាប់ព្រឹត្តិការណ៍ UEFA Nations League មុនពេលធ្វើជាម្ចាស់ផ្ទះទទួលក្រុមភ្ញៀវប៉ូឡូញ នៅ៣ថ្ងៃបន្ទាប់៕

ប្រភព៖ BBC