(អង់គ្លេស)៖ យោងតាមគេហទំព័រកីឡា BBC បានចុះផ្សាយឲ្យដឹងថា ក្លឹបតោខៀវ Chelsea FC បានយល់ព្រមលើតម្លៃខ្លួនផ្ទេរប្រមាណ ៥៤លានផោន ដែលស្មើនឹងជាង ៦៨លានដុល្លារ ពីក្លឹបចចកខ្មៅ Wolverhampton Wanderers ក្នុងការនាំយកខ្សែបម្រើប្រយុទ្ធស្លាប Pedro Neto ។

សូម Subscribe Telegram របស់ Cambosport ដើម្បីទទួលបានព័ត៌មានឆាប់រហ័ស

ខ្សែបម្រើស្លាប សញ្ជាតិព័រទុយហ្គាល់ ដែលមានវ័យ ២៤ឆ្នាំ នឹងត្រូវពិនិត្យសុខភាពមុនពេលបញ្ចប់ការផ្ទេរទៅកាន់កីឡដ្ឋាន Stamford Bridge ដែលការផ្ទេរស្ថិតក្នុងតម្លៃនេះ នឹងធ្វើឱ្យក្លឹប Chelsea កើនទឹកប្រាក់ចំណាយលើការទិញសមាជិកថ្មីនាទីផ្សារដោះដូររដូវក្តៅនេះ លើសពី ២០០លានផោន ទៅហើយនោះ។

គួរជម្រាបផងដែរថា Pedro Neto បានលេងជាមួយក្លឹបចចកខ្មៅ Wolves ចំនួន ៥រដូវកាល ដោយរកបាន ១៤គ្រាប់ ពីការលេង ១៣៥ប្រកួតនៅគ្រប់កម្មវិធីទាំងអស់របស់ក្លឹប ខណៈបើកិច្ចព្រមព្រៀងទិញលក់ត្រូវបញ្ចប់លើតម្លៃនេះមែន នោះរូបគេនឹងក្លាយជាកីឡាករម្នាក់ ដែលមានតម្លៃផ្ទេរកំណត់ត្រារបស់ក្លឹបចចកខ្មៅ បន្ទាប់ការផ្ទេរចេញរបស់កីឡាករ Ruben Neves ក្នុងតម្លៃ ៤៧លានផោន ទៅក្លឹបលីគអារ៉ាប៊ីសាអូឌីត ៕

ប្រភព៖ BBC