(បរទេស)៖ យោងតាមសារព័ត៌មាន BBC បានឲ្យដឹងថា អតីតខ្សែប្រយុទ្ធឆ្នើមនៅលីគអង់គ្លេសលោក Craig Bellamy ត្រូវបានតែងតាំងជាអ្នកចាត់ការទូទៅថ្មីរបស់ក្រុមជម្រើសជាតិវេលស៍ ដើម្បីជំនួសតំណែងលោក Rob Page ក្នុងគោលដៅដឹកនាំក្រុមបន្តការប្រកួតប្រជែងវគ្គជម្រុះ World Cup ២០២៦។
សូម Subscribe Telegram របស់ Cambosport ដើម្បីទទួលបានព័ត៌មានឆាប់រហ័ស
លោក Craig Bellamy មានវ័យ ៤៤ឆ្នាំ ធ្លាប់ជាអតីតខ្សែប្រយុទ្ធឆ្នើមមួយរូបជាមួយក្លឹបលំដាប់នៃលីគអង់គ្លេស មានដូចជាក្លឹប Liverpool, Manchester City និង West Ham United ជាដើម និងធ្លាប់ទទួលបានការងារជាគ្រូបង្វឹកស្តីទីនៅក្លឹប Burnley មុនពេលតែងតាំងលោក Scott Parker ។
ជាមួយគ្នានេះលោក Craig Bellamy គឺជាអតីតកីឡាករម្នាក់ ដែលធ្លាប់លេងបានចំនួន ៧៨ប្រកួត សម្រាប់ជម្រើសជាតិវេលស៍ មុនពេលចូលនិវត្តន៍កាលពីឆ្នាំ២០១៣ ។
គួរបញ្ជាក់ដែរថា ការដឹកនាំក្រុមដំបូងរបស់លោក Bellamy គឺការប្រកួតប្រជែងស្វែងរកកៅអីឡើងទៅលេង UEFA Nations League A ដែលពេលនេះក្រុមវេលស៍ កំពុងស្ថិតក្រុមទី៤ នៃកម្រិត UEFA Nations League B នៃរដូវកាល២០២៤-២៥ ៕
ប្រភព៖ BBC
