(អារ៉ាប៊ីសាអូឌីត)៖ អ្នកសារព័ត៌មានលើការផ្ទេរកីឡាករដ៏ជំនាញលោក Fabrizio Romano បានអះអាងថា ខ្សែការពារវ័យ ៣៤ឆ្នាំ Nacho Fernandez របស់ម្ចាស់ក្លឹបជើងឯក UCL ១៥សម័យ Real Madrid កំពុងត្រៀមនឹងចុះ​ហត្ថលេខា​ចូលរួមជាមួយក្លឹប Al Qadsiah ក្នុង​ក្រប​ខ័ណ្ឌអារ៉ាប៊ីសាអូឌីត Saudi Pro League បន្ទាប់​ពី​បាន​ធ្វើ​ការ​ពិនិត្យ​សុខភាពរួចរាល់កាលពីម្សិលមិញ។

គួរជម្រាបដែរថា ប្រធានក្រុម Nacho នឹងនិយាយលាគ្នាទៅកាន់អ្នកគាំទ្រ ក្រោយរួមរស់ជាមួយ Real Madrid អស់រយៈពេលជាង ២៣ឆ្នាំ។ ទន្ទឹមនឹងនេះ កុងត្រាជាមួយក្រុម Al Qadsiah នឹងមានសុពលភាពដល់ខែមិថុនា ឆ្នាំ២០២៦ នេះបើយោងតាមព័ត៌មាន ESPN បានបញ្ជាក់។ ដោយឡែក Nacho បានរួមចំណែកឈ្នះពានរង្វាន់សរុប ២៦ ជាមួយ Real Madrid ដោយបានចូលរួមតាំងពីមានអាយុត្រឹមតែ ១១ឆ្នាំ មកម្លេស។

មិនតែប៉ុណ្ណេាះ Nacho គឺជាកីឡាករម្នាក់ក្នុងចំណោមកីឡាករទាំង ៥នាក់ ដូចទៅនឹង Luka Modric, Toni Kroos, Dani Carvajal និង Paco Gento ដែលឈ្នះពានរង្វាន់ទ្វីបអឺរ៉ុប UCL ចំនួន ៦លើក ៕

ប្រភព៖ Fabrizio Romano & ESPN