(អង់គ្លេស)៖ ខ្សែបម្រើឆ្នើម Bernardo Silva បានជម្រុញឲ្យមិត្តរួមជាតិរបស់គាត់ គឺកីឡាករ Joao Neves ឱ្យបដិសេធការផ្ទេរទៅកាន់ក្រុមគូប្រជែងមានមូលដ្ឋានរួមទីក្រុងគឺបិសាចក្រហម  Manchester United ដោយជំនួសឲ្យការផ្លាស់ទៅលេងនៅក្លឹបមេឃខៀវ Manchester City របស់ខ្លួននៅរដូវក្តៅខាងមុខនេះវិញ។

សូម Subscribe Telegram របស់ Cambosport ដើម្បីទទួលបានព័ត៌មានឆាប់រហ័ស

សម្រាប់ក្រុមMan. United បានកំណត់ការផ្ទេរកីឡាករ Neves ជាគោលដៅដ៏សំខាន់ បើទោះបីជាក្រុមម្ចាស់ជើងឯកអង់គ្លេស ២០សម័យ បានបរាជ័យការដេញថ្លៃកីឡាករឆ្នើមរបស់ក្រុម Benfica រូបនេះនូវទឹកប្រាក់ប្រមាណ ៥១លានផោន កាលពីពេលកន្លងទៅក៏ដោយ។ ដោយឡែក សម្រាប់ខ្សែបម្រើឆ្នើម Silva  បច្ចុប្បន្នមានវ័យ ២៩ឆ្នាំ​ បានប្រាប់គេហទំព័រ Metro UK យ៉ាងដូច្នេះថា៖ «ខ្ញុំបានប្រាប់ Neves ឱ្យផ្ទេរមក Man City ។ ខ្ញុំចង់ឃើញគាត់នៅក្បែរខ្ញុំ។ ប៉ុន្តែ​ខ្ញុំ​ចង់​បាន​អ្វី​ដែល​ល្អ​បំផុត​សម្រាប់​គាត់ថែមទៀតផង។»

តាមការពិត Man Utd ចង់ចុះហត្ថលេខានាំយកយុវជនដែលរីកចម្រើនលូតលាស់ចេញពីក្លឹប Benfica បច្ចុប្បន្នមានមានវ័យ ១៩ឆ្នាំរូបនេះយកមកជំនួសតំណែងកីឡាករអន្តរជាតិប្រេស៊ីល Casemiro បន្ទាប់ពីបង្ហាញទម្រង់លេងមិនបានលទ្ធផលល្អសម្រាប់រដូវកាលទី២នៅទឹកដី  Old Trafford ។ ហើយសម្រាប់ខ្សែបម្រើអន្តរជាតិព៍័រទុយហ្គាល់ Neves មានតម្លៃខ្លួនរហូតដល់ទៅ ១០៥ លានផោនឯណោះ ប៉ុន្តែទោះជាយ៉ាងណា Benfica នឹងពិចារណាលើសំណើរផ្តល់ជូននៅត្រឹមចន្លោះរង្វង់ទឹកប្រាក់ប្រមាណ ៨៥លានផោន សម្រាប់កីឡាករមានវ័យទើបតែ១៩ឆ្នាំរូបនេះ៕

ប្រភព៖ dialypost