(អង់គ្លេស)៖ លោក Sir Jim Ratcliffe សហម្ចាស់ក្លឹបបិសាចក្រហម Manchester United នឹងមិនផ្តល់ថវិកាដ៏ច្រើនសម្រាប់ការចំណាយលើការទិញដូរកីឡាករនារដូវក្តៅនេះទេ។ យោងតាមប្រភពពីគេហទំព័រ UK Telegraph បានចុះផ្សាយថាមហាសេដ្ឋីឧស្សាកម្មលោក Ratcliffe ដែលជាស្ថាបនិកក្រុមហ៊ុនអ៊ីណូស INEOS មានគោលបំណងសំខាន់ ២ ដូចតទៅ៖

• ទី១៖ គឺជៀសវាងលើការបំពានច្បាប់ប្រាក់ចំណេញ និងនិរន្តរភាពឬហៅកាត់ថា ‘ PSR ‘។ មានន័យថាការ​សម្រេច​ចិត្ត​នេះ​នឹង​ធ្វើ​ឱ្យក្រុមបិសាចក្រហមមិន​បាន​ចំណាយប្រាក់​ច្រើន​ដូចកាលពីពេលកន្លងទៅថ្មីៗនេះ ដោយពួក​គេ​បានចំណាយ​ប្រាក់​ប្រមាណ ១៧៥លាន​ផោន​ លើ​ការនាំយកសមាជិក​ថ្មីៗមករួមក្រុម។
• ទី២៖ ពួកគេចង់បង្វឹក និងមើលឃើញកីឡាករវ័យក្មេង ដែលរីកធំធាត់ពីយុវជនថ្នាលរបស់ក្លឹបអាចនឹងកសាងសមត្ថភាព និងកេរ្ត៍ឈ្មោះដើម្បីជួយក្លឹប ប្រសើរជាងនាំយកកីឡាករដែលមានតម្លៃ និងប្រាក់ឈ្នួលថ្លៃៗមករួមក្រុម។

ផ្ទុយទៅវិញ Man Utd សម្លឹងចង់ប្រមូលប្រាក់បានមួយចំនួនឡើងវិញពីការលក់កីឡាករ Mason Greenwood និង Jadon Sancho បន្ទាប់ពីពួកគេបានដាក់កីឡាករទាំងពីររូបឲ្យលេងក្នុងលក្ខខណ្ឌខ្ចីជើងនៅក្លឹបពីរផ្សេងគ្នានាលីគកំពូលដ៏ធំទាំង២របស់អឺរ៉ុប៕