ក្លឹបយក្សអេស្ប៉ាញ Real Madrid ត្រៀមបង់លុយរាប់លានទៅកាន់ Chelsea ក្នុងករណី Eden Hazard បើទោះបីខ្សែប្រយុទ្ធជម្រើសជាតិប៊េហ្សិករូបនេះចូលនិវត្តន៍ហើយក្តី។ Real Madrid ទើបបានយកឈ្នះពានរង្វាន់លើកទី១៥របស់ខ្លួននៅក្នុងពានរង្វាន់ UEFA Champion League កាលពីថ្ងៃសៅរ៍ ដោយបានយកឈ្នះលើក្រុម Dortmund ដោយលទ្ធផល 2-0 នៅក្នុងកីឡដ្ឋាន Wembley ដោយការរកគ្រាប់បាល់ដោយ Dani Carvajal និង Vinicius Jr ។
ក្រោយជោគជ័យនេះ បច្ចុប្បន្នក្លឹប Real Madrid ត្រូវបង់លុយចំនួន៥លានផោនបន្ថែមទៀតទៅកាន់ក្លឹប Chelsea ដោយជាផ្នែកមួយនៃកិច្ចព្រមព្រៀង Eden Hazard កាលពីឆ្នាំ២០១៩ នេះបើយោងតាមការចុងផ្សាយដោយ ESPN ។ ទោះបីជាខ្សែប្រយុទ្ធ ប៊ែលហ្សិក បានចូលនិវត្តន៍ក្តីកាលពីរដូវក្តៅលើកមុន ដោយការព្រមព្រៀងពីភាគីពាក់ព័ន្ធទាំងក្នុងការផ្តាច់កុងត្រាមុនពេលកំណត់ ខណៈក្រោយមក Hazard ក៏ប្រកាសថា ខ្លួនចូលនិវត្តន៍តែម្តងក្នុងវ័យត្រឹមតែ៣២ឆ្នាំ ។ ទោះបីជា Hazard ចូលនិវត្តន៍ តែបច្ចុប្បន្នកិច្ចសន្យាព្រមព្រៀងរវាងភាគីក្លឹបទាំង២គឺនៅអនុវត្តធម្មតា ដូច្នេះហើយមានន័យថា Real Madrid នឹងត្រូវបង់ចំនួនទឹកប្រាក់ ៥លានផោន ទៅកាន់ Chelsea ក្រោយទទួលបានជោគជ័យក្នុងពានរង្វាន់ UEFA Champion League ៕
