(ប្រេស៊ីល)៖ ខ្សែបម្រើកណ្តាល Casemiro ដែលកំពុងប្រកបអាជីពជាមួយក្លឹបបិសាចក្រហម Manchester United ពេលនេះមិនបានជាប់ឈ្មោះក្នុងក្រុម ២៣នាក់របស់ជម្រើសជាតិប្រេស៊ីល នោះទេ ក្នុងការត្រៀមលេងពានរង្វាន់ Copa America នៅខែក្រោយនេះ នេះបើតាមប្រភពពីគេហទំព័រ BBC នាថ្ងៃទី១១ ខែឧសភា ឆ្នាំ២០២៤ ។

ជម្រាបដែរថា កីឡាករវ័យ ៣២ឆ្នាំ Casemiro ធ្លាប់បានជាប់ជម្រើសជាតិ ៧៥លើកលេងឱ្យប្រេស៊ីល ដោយបានស៊ូទ្រាំនឹងរដូវកាលដ៏លំបាកនៅទឹកដីកីឡដ្ឋាន Old Trafford និងត្រូវបានដកចេញពីជម្រើសលោក Dorival Jr របស់ជម្រើសជាតិប្រេស៊ីស។

ជាមួយគ្នានេះដែរ ខ្សែប្រយុទ្ធ Richarlison របស់ក្លឹប Tottenham, ខ្សែប្រយុទ្ធ Gabriel Jesus របស់ក្លឹប Arsenal និងមិត្តរួមក្រុមរបស់ Casemiro កីឡាករ Antony ក៏មិនត្រូវបានជ្រើសរើសចូលក្រុមសាំប៉ាប្រេស៊ីលផងដែរ។ រំលឹកផងដែរថា Casemiro បានផ្ទេរមកកាន់ក្លឹប Man United កាលពីឆ្នាំ២០២២ ខណៈរូបគេក៏ជាខ្សែបម្រើម្នាក់រកបាន ៧គ្រាប់ឱ្យជម្រើសជាតិប្រេស៊ីល នឹងធ្លាប់រួមចំណែកជួយក្រុមលើកពាន Copa America កាលពីឆ្នាំ២០១៩៕