លោក Todd Boehly ដែលជាមហាសេដ្ឋីជំនួញជនជាតិអាមេរិកនិងជាម្ចាស់ក្លឹប Chelsea បានបង្ហាញវត្តមានចូលរួមក្នុងសន្និសិទ Sportico នៅទីក្រុង Los Angeles ហើយបានពណ៌នាពីក្រុមតោខៀវ ថាបានផ្លាស់ប្តូរទម្រង់លេងល្អប្រសើរនិងគួរអោយចាប់អារម្មណ៏នៅក្នុងប៉ុន្មានប្រកួតចុងក្រោយថ្មីៗនេះ។មានន័យថាមហាសេដ្ឋីវ័យ៥០ឆ្នាំលោក Boehly បានសម្តែងនូវការពេញចិត្តសម្រាប់ក្រុមរបស់គាត់ ហើយបានលើកឡើងថាក្រុមដែលកំពុងដឹកនាំដោយគ្រូបង្វឹកអន្តរជាតិអាហ្សង់ទីនលោក Mauricio Pochettino បានបង្ហាញការលេងបាល់ដ៏ល្អគួរអោយចាប់អារម្មណ៏ឡើងវិញ។

ម្ចាស់ក្លឹបដែលកំពុងកាន់កាប់ក្លឹបមានមូលដ្ឋាននៅភាគខាងលិចទីក្រុងឡុងដ៏នៅរដូវកាលទីពីររូបនេះបានលើកឡើងក្រោយការប្រកួតស្មើជាមួយ Aston Villa (២-២), ផ្តួល​Tottenham (២-០) និងបន្តលត់ West Ham (៥-០)  បានបញ្ជាក់យ៉ាងដូជ្នេះថាៈ ខ្ញុំមិននឹកស្មានថាក្រុមអាចផ្លាស់ប្តូរទម្រង់លេងលឿនបែបនេះទេ។វាពិតជាស្រស់ស្អាតនៅពេលដែលឃើញពួកគេលេងស៊ីសង្វាក់គ្នា។

ប្រសិនក្រុមបន្តរក្សាទម្រង់លេងល្អដល់បញ្ចប់រដូវកាល ពួកគេពិតជាចង់បញ្ចប់នៅចំណាត់ថ្នាក់លេខ ៥ ក្នុងក្របខ័ណ្ឌ Premier League ដែលជាក្រុមមានកៅអីទៅលេងនៅក្របខណ្ឌ Europa League ។ ក្រុមតោខៀវបច្ចុប្បន្នកំពុងមាន ៤ ពិន្ទុតាមពីក្រោយក្រុម Newcastle និងនៅសល់បីប្រកួតទៀតខណៈ Chelsea និងត្រូវធ្វើដំណើរទៅសួរសុខទុក្ខ Nottingham Forest នៅថ្ងៃសៅរ៍ចុងសប្តាហ៏នេះមុនពេលជួប Brighton នៅពាក់កណ្តាលសប្តាហ៍ក្រោយ ហើយប្រកួតបិទបញ្ចប់រដូវកាលលីគកំពូលនៅថ្ងៃអាទិត្យក្រោយទល់នឹង Bournemouth នៅទឹកដី Stamford Bridge ខ្លួនឯង។
ប្រភព:Besoccer