បរទេស៖ ក្លឹបបាល់ទាត់ Cardiff City ត្រូវបានគេរាយការណ៍ថា ទាមទារឱ្យ Nantes ផ្តល់សំណងដល់ពួកគេចំនួន 104 លានផោនសម្រាប់ការស្លាប់របស់ Emiliano Sala ក្នុងឧប្បត្តិហេតុធ្លាក់យន្តហោះក្នុងឆ្នាំ 2019 ។ គួររំលឹកថា Cardiff បានយល់ព្រមលើកិច្ចព្រមព្រៀងតម្លៃ 15 លានផោន ដើម្បីចុះហត្ថលេខាលើ Sala ពីក្លឹបបារាំង Nantes ប៉ុន្តែយន្តហោះ Piper Malibu ម៉ាស៊ីនតែមួយដែលដឹក Sala ទៅកាន់ប្រទេស Wales បានធ្លាក់នៅក្នុងថ្ងៃទី២១ខែមករាឆ្នាំ២០១៩ និងធ្វើឲ្យបាត់បង់អាយុជីវិតអស់មនុស្ស២នាក់នៅលើយន្តហោះ ហើយសាកសពរបស់ Sala ត្រូវបានគេរកឃើញនៅថ្ងៃទី០៧ខែកុម្ភៈឆ្នាំ២០១៩ ខណៈអ្នកបើកយន្តហោះលោក Ibbotson មិនត្រូវបានរកឃើញឡើយ។

យោងទៅតាម របាយការណ៍ L’Equipe ក្លឹបបាល់ទាត់ Cardiff City បានដាក់ពាក្យបណ្តឹងនៅតុលាការបារាំងកាលពីថ្ងៃចន្ទប្រឆាំងនឹងក្លឹបបាល់ទាត់ de Nantes ដោយទាមទារការខាតបង់ច្រើនជាង 100 លានផោនបន្ទាប់ពីមានជម្លោះជុំវិញការស្លាប់របស់ខ្សែប្រយុទ្ធ Emiliano Sala ក្នុងឧប្បត្តិហេតុធ្លាក់យន្តហោះកាលពីខែមករាឆ្នាំ 2019 ។ មេធាវីរបស់ក្លឹបវេលស៍ Cardiff លោក Celine Jones បាននិយាយថា តួលេខ 120.2 លានអឺរ៉ូ (104 លានផោន) ត្រូវបានប៉ាន់ប្រមាណបន្ទាប់ពី “ការវិភាគស៊ីជម្រៅ” ដោយអ្នកជំនាញផ្នែកច្បាប់៕