(បរទេស)៖ ក្លឹបចំនួន៣ ត្រូវបានគេរាយការណ៍ថា កំពុងពិចារណាលើការតែងតាំងលោក Erik ten Hag ជាគ្រូបង្វឹកថ្មី ប្រសិនបើគាត់ត្រូវបានបណ្តេញចេញពីក្លឹបបិសាចក្រហម Manchester United។ យោងតាមសារព័ត៌មាន Daily Star បានអះអាងក្លឹបយក្សនៅអាល្លឺម៉ង់ Bayern Munich, Bayer Leverkusen និង Stuttgart បានកំណត់គោលដៅលើបុរសហូឡង់វ័យ ៥៤ឆ្នាំ ដើម្បីផ្តល់ការងាក្នុងនាមជាអ្នកចាត់ការទូទៅក្លឹប។
ទន្ទឹមនឹងនេះ លោក Ten Hag ជិតនឹងបញ្ចប់រដូវកាលទី២ របស់គាត់នៅ Old Trafford ហើយដោយរូបគាត់បានចាកចេញពីក្លឹប Ajax ដើម្បីជំនួសលោក Ralf Rangnick ក្នុងឆ្នាំ ២០២២។ ជាក់ស្តែង គាត់កំពុងដឹកនាំ Man Utd ឡើងមកកាន់វគ្គ ៤ ក្រុមចុងក្រោយនៅ FA CUP ខណៈក្លឹបកំពុងឈរនៅលេខ៦ នៅតារាង Premier League។
ស្របពេលជាមួយគ្នានេះ Bayern គ្រោងនឹងបញ្ចប់តំណែងលោក Thomas Tuchel នៅចុងរដូវកាលផងដែរ ចំពេលលោក Xabi Alonso ទទួលបានការចាប់អារម្មណ៍ពីបណ្តាក្លឹបធំៗជាច្រើន ដែលធ្វើឲ្យក្លឹប Bayer Leverkusen ត្រូវមានអ្នកគ្រប់គ្រងថ្មីបម្រុងទុកផងដែរ។ ចំណែកឯក្លឹប Stuttgart វិញ ចាប់អារម្មណ៍លើលោក Ten Hag ដើម្បីផ្លាស់ប្តូរលោក Sebastian Hoeness ប្រសិនឱកាសមកដល់៕
ប្រភព៖ SPORTbible
