(អង់គ្លេស)៖ អ្នកចាត់ការទូទៅក្រុមមាន់ខ្នាយមាស Tottenham Hotspur លោក Ange Postecoglou បានបង្ហើបថា ខ្សែប្រយុទ្ធឆ្នើម Richarlison កំពុងប្រឈមមុខនឹងការសម្រាកចន្លោះពី ២ទៅ៣សប្តាហ៍ ជាមួយនឹងបញ្ហារបួសជង្គង់។ បន្ទាប់ពីតស៊ូដើម្បីសម្របខ្លួនទៅនឹងជីវិតនៅទីក្រុងឡុងដ៍ខាងជើង កីឡាករអន្តរជាតិប្រេស៊ីលបានរីកដុះដាលនៅក្រោមការដឹកនាំរបស់លោក Postecoglou ជាមួយនឹងការរកគ្រាប់បាល់បាន ១០គ្រាប់ នៅ Premier League ក្នុងចំណោមប្រកួត ២២លើក ក្នុងយុទ្ធនាការ ២០២៣-២៤ ។

ថ្លែងទៅកាន់បណ្តាញផ្សព្វផ្សាយរបស់ Tottenham កាលពីថ្ងៃសុក្រ លោក Postecoglou ក៏បានបញ្ជាក់ដែរថា Richarlison បានរងរបួសជង្គង់ ហើយអតីតកីឡាករ Everton រូបនេះនឹងមិនមានវត្តមានសម្រាប់ការប្រកួតបន្ទាប់ទៀតឡើយ រងចាំជាសះស្បើយ និងការបញ្ជាក់ពីគ្រូពេទ្យជាមុនសិន៕