(អង់គ្លេស)​៖ ខ្សែការពារ Djed Spence របស់ក្រុមមាន់ខ្នាយមាស Tottenham Hotspur បាននិយាយថាគាត់ចង់មាន “ដំណើរដ៏វែងឆ្ងាយ” ជាមួយក្រុម Genoa បន្ទាប់ពីការផ្លាស់ប្តូរខ្ចីជើងនៅខែមករាកន្លងទៅ។

Spence បានចំណាយពេលពាក់កណ្តាលនៃរដូវកាលនេះក្នុងការខ្ចីជើងនៅ Leeds United មុនពេលដែលក្រុមលេងនៅលីគ Championship ជ្រើសរើសបញ្ចប់ការខ្ចីជើងកាលពីខែមុន។ កីឡាករវ័យ ២៣ ឆ្នាំរូបនេះបានព្យាយាមធ្វើឱ្យមានផលប៉ះពាល់យ៉ាងខ្លាំងនៅឯ Elland Road បន្ទាប់ពីចំណាយពេលជាង ២ខែ នៅក្រៅផ្ទះជាមួយនឹងរបួសជង្គង់។

បន្ទាប់ពីត្រលប់ទៅ Tottenham វិញខ្សែការពារវ័យ ២៣ឆ្នាំ បានផ្លាស់ទៅកាន់ Genoa យ៉ាងឆាប់រហ័ស ដោយចូលរួមជាមួយក្រុមអ៊ីតាលីក្នុងលក្ខខ័ណ្ឌខ្ចីជើង។ ជាមួយនឹងជម្រើសទិញ ខ្សែការពារ Spence ចង់បន្តស្នាក់នៅក្លឹបថ្មី Genoa ជាអចិន្ត្រៃយ៍តែម្តង មុនពេលរដូវកាលថ្មីមកដល់។

គួរកត់សម្គាល់ថា Spence បានព្យាយាមបង្កើតខ្លួនឯងនៅទីក្រុងឡុងដ៍ខាងជើង បន្ទាប់ពីបានចូលរួមជាមួយក្លឹបពី Middlesbrough ក្នុងកិច្ចព្រមព្រៀង ១៥លានផោន នៅរដូវក្តៅឆ្នាំ២០២២។ បន្ទាប់ពីបរាជ័យក្នុងការធ្វើឱ្យមានការចាប់អារម្មណ៍ក្រោមការដឹកនាំរបស់អ្នកចាត់ការ Antonio Conte នោះ Spence បានខ្ចីជើងទៅ Rennes សម្រាប់ពាក់កណ្តាលទីពីរនៃរដូវកាលមុន។ គួរជម្រាបផងដែរថា អតីតកីឡាករជម្រើសជាតិអង់គ្លេសអាយុក្រោម ២១ឆ្នាំ អាចចាប់ផ្តើមការប្រកួតជាលើកទី៤ ជាប់ៗគ្នានៅពេលដែល Genoa ប៉ះ Atalanta ក្នុងការប្រកួតក្នុងផ្ទះនៅថ្ងៃអាទិត្យ៕

ប្រភព៖ SportsMole