(អង់គ្លេស)៖ គ្រូបង្វឹកក្រុមបិសាចក្រហមលោក Erik ten Hag បានលើកឡើងថា Manchester United លែងជាក្លឹបកំពូលនៅ Premier League ទៀតហើយ បន្ទាប់ពីចាញ់ West Ham ២-០ កាលពីថ្ងៃសៅរ៍។ ទន្ទឹមនឹងនេះ គ្រូសញ្ជាតិហូឡង់រូបនេះមិនអាចលាក់បាំងការខកចិត្តរបស់គាត់បានទេ ដោយបាននិយាយប្រតិកម្មប្រាប់ទៅកាន់ប្រព័ន្ធផ្សព្វផ្សាយ បន្ទាប់ពីការបរាជ័យលើកទី ១៣ របស់គាត់ក្នុងរដូវកាលនេះ។
លើសពីនេះ គាត់បានបន្ថែមប្រាប់ BBC Sport ថា «ឥឡូវនេះយើងលែងនៅកំពូលទៀតហើយ ដោយឡែកនៅសប្តាហ៍មុនពួកយើងបានប្រកួតប្រជែងខ្លាំង បើទោះជាយើងមិនបានស៊ុតបញ្ចូលទី ប៉ុន្តែយើងលេងបានល្អបំផុតនៅក្នុងការប្រកួត»។ មិនតែប៉ុណ្ណោះ លោក Ten Hag យល់ថា ខ្សែការពាររបស់ United ល្អតាមការប្រកួតប៉ុណ្ណោះ ហើយវាមិនមែនជាអ្វីដែលគ្រូបង្វឹកចង់បាននោះទេ ដោយលោក Ten Hag ចង់បានភាពល្អជាប្រចាំនៅគ្រប់ការប្រកួតទាំងអស់នៅលើទីលាន។
គួរជម្រាបដែរថា Man Utd ឈរនៅចំណាត់ថ្នាក់លេខ៨ ក្នុងលីគ EPL មាន ២៨ពិន្ទុ តាមពីក្រោយក្រុមកំពូលតារាង Arsenal ១២ពិន្ទុ។ ទោះជាយ៉ាងណាក៏ដោយ លោក Ten Hag ជឿជាក់ថាក្រុមរបស់គាត់នឹងប្រសើរឡើងនៅក្នុងឆ្នាំថ្មី៕
ប្រភព៖ THE SUN
