(ទួរគី)៖ នៅក្នុងសេចក្តីថ្លែងការណ៍មួយរបស់សហព័ន្ធបាល់ទាត់ទួរគីបាននិយាយថា ខ្លួនបានសម្រេចចិត្ត «ចែកផ្លូវជាមួយលោក Stefan Kuntz»។ រឿងហេតុនេះបានកើតឡើងពីរថ្ងៃមកហើយ បន្ទាប់ពីការបរាជ័យក្នុងការប្រកួតមិត្តភាព ដោយបញ្ចប់ក្នុងលទ្ធផល ៤ទល់២ ជាមួយនឹងប្រទេសជប៉ុន។ លោក Kuntz មានវ័យ៦០ឆ្នាំ បាននិយាយថា កីឡាកររបស់គាត់ត្រូវតែខិតខំបន្ថែមទៀត ហើយបានបន្ថែមទៀតថា «មិនគួរបន្ទោសបញ្ហាទាំងស្រុងមកកាន់រូបខ្ញុំតែម្នាក់ឡើយ»។

រំលឹកផងដែរថា គាត់ជាអតីតខ្សែប្រយុទ្ធជម្រើសជាតិអាឡឺម៉ង់ ដែលបានស៊ុតបញ្ចូលទីទល់នឹងក្រុមអង់គ្លេសនៅ យ៉ូរ៉ូឆ្នាំ៩៦ ហើយត្រូវបានតែងតាំងជាគ្រូបង្វឹកប្រទេសទួរគីក្នុងខែកញ្ញា ឆ្នាំ២០២១ បន្ទាប់ពីដឹកនាំក្រុមជម្រើសជាតិអាយុក្រោម ២១ឆ្នាំរបស់អាឡឺម៉ង់ឈ្នះជើងឯកអឺរ៉ុបក្នុងឆ្នាំ ២០១៧ និង ២០២១។ ប្រទេសទួរគីបានឈ្នះការប្រកួតចំនួន១២ ក្នុងចំណោម២០ប្រកួត ប៉ុន្តែបានបរាជ័យក្នុងការប្រកួត World Cup កាលពីឆ្នាំមុននៅប្រទេសកាតា៕

ប្រភព៖ BBC ចុះផ្សាយថ្ងៃទី២០ ខែកញ្ញា ឆ្នាំ២០២៣