បរទេស៖ លោក Zinedine Zidane នៅតែជាជម្រើសដ៏មានអាទិភាពសម្រាប់ក្រុមអធិរាជស Real Madrid ប្រសិនជាគ្រូបង្វឹកលោកCarlo Ancelotti ចាកចេញពីក្លឹបជាលើកទីពីរនៅរដូវក្តៅនេះ។គួរបញ្ជាក់ថាអតីតគ្រូបង្វឹកឈុតធំ ដែលធ្លាប់ជួយក្លឹបឈ្នះChampion League ៣សម័យកាលជាប់ៗគ្នាសញ្ជាតិបារាំងរូបនេះនៅមិនទាន់មានការងារធ្វើនៅឡើយទេ ក្រោយពីបំណងចង់បង្វឹកក្រុមជម្រើសជាតិមាន់គកបារាំងបានទទួលបរាជ័យ។ មួយវិញទៀតគឺបន្ទាប់ ពីលោក Didier Deschampសម្រេចបន្តចុះកុងត្រាថ្មីក្រោយបរាជ័យនៅព្រឹត្តិការណ៏វគ្គផ្តាច់ព្រ័ត្រWorld Cup ២០២២រួចមក។
ខាងក្រោមនេះគឺជាហេតុផល២ចំនុចដែលលោកZinedine Zidane អាចនិងយល់ព្រមត្រលប់មកដឹកនាំនៅទឹកដី Santiago Bernabeu វិញៈ
១.បន្តរក្សាទុក Eden Hazard
Zidane ពេញចិត្តសមត្ថភាពរបស់ Hazard បំផុត ប៉ុន្តែផ្ទុយទៅវិញខ្សែបម្រើសញ្ជាតិបែលហ្ស៊ិករូបនេះមិនបានស្ថិតក្នុងបញ្ជីដាក់អោយលេងសម្រាប់ក្រុមលោកCarlo Ancelotti នោះទេ ខណៈរូបគេស្ទើរតែចាកចេញពីក្លឹបទៅហើយនោះក្រោយជួបបញ្ហារបួសជាញឹកញាប់ និងធ្លាក់ទម្រង់លេង។ បើទោះបីជាកិច្ចសន្យារបស់ខ្លួនមានសុពលភាពដល់ឆ្នាំ២០២៤ ប៉ុន្តែក្លឹបត្រៀមរួចជាស្រេចក្នុងការអនុញ្ញាតិអោយវីរបុរសក្រុមតោខៀវChelsea រូបនេះចាកចេញនៅពេលបញ្ចប់រដូវកាលនេះ។
២.នាំយក Dupont
Gregory Dupont គឺជាប្រធានផ្នែកកាយសម្បទារបស់ក្លឹបក្រោមការដឹកនាំរបស់លោក Zidane កន្លងមក ។ លើសពីនេះទៀតលោកDupont ធ្លាប់ធ្វើការនៅក្លឹប Lille ក្នុងពេលដំណាលគ្នាជាមួយ Hazard លេងនៅទីនោះមុនផ្លាស់មកChelsea។ ហើយកំលុងពេលនោះគឺHazardធ្លាប់រងរបួសតែ១លើកប៉ុណ្ណោះ ក្នុងអាជីពរយៈពេល ៣ ឆ្នាំនៅLigue-១ ។
