បរទេស៖ សមាជិកសំខាន២រូបគឺ Mohamed Salah និង Virgil van Dijk របស់ Liverpool បានត្រលប់មកហ្វឹកហាត់វិញមុនការ ប្រកួត​ចុងក្រោយនៃរដូវកាលនេះជាមួយនឹងក្រុម Wolverhampton Wanderers នៅថ្ងៃអាទិត្យ។

អ្នកទាំងពីរបានអវត្តមាន សម្រាប់​ជ័យ​ជម្នះ​ដ៏សំខាន់របស់ Liverpool លើក្រុម Southampton កាលពីថ្ងៃអង្គារ បន្ទាប់ពីSalah រងរបួសក្រលៀន ខណៈVan Dijk មាន​បញ្ហា​ជង្គង់ក្នុងការប្រកួត FA Cup ជាមួយChelsea កាលពីចុងសប្តាហ៍មុន។ ជាដំណឹងដ៏ល្អសម្រាប់ក្រុមលោក Jurgen Klopp បន្តក្តីសង្ឃឹមដើម្បីប្រជែងពានជាមួយ Ma. City ដែលមានគម្លាត​ត្រឹមតែ១​មួយពិន្ទុនៅលើកំពូលតារាងក្របខ័ណ្ឌ Premier League ។ Salahក៏នៅតែជាបេក្ខភាពប្រជែងពានស្បែកជើងមាសផងដែរ ជាមួយ Heung-min Son របស់ក្រុម Tottenham Hotspur ខណៈ ទាក់ទងនិងការវិលត្រលប់មកហ្វឹកហាត់វិញរបស់ Salah និង Van Dijk អ្នកចាត់​ការសញ្ជាតិអាឡឺម៉ង់លោក  Jurgen Klopp បានបញ្ជាក់ប្រាប់ថាៈ ដំណោះស្រាយដែលខ្ញុំពេញចិត្តគឺពួកគេទាំងអស់គ្នាអាច​លេង​នៅចុងសប្តាហ៍ដើម្បីបន្តក្តីសង្ឃឹមការពារតំណែង​ជើង​ឯក។

បន្ទាប់ពីការប្រកួតដ៏សំខាន់ជាមួយ Wolves នៅថ្ងៃអាទិត្យ Liverpool ក៏នឹងត្រៀមលក្ខណៈសម្រាប់កីឡាករទាំងពីររូបដើម្បីប្រកួតជាមួយ Real Madrid ក្នុងវគ្គផ្តាច់ព្រ័ត្រ Champions League នៅថ្ងៃសៅរ៏ទី ២៨ ខែឧសភាខាងមុខផងដែរ៕

ប្រភពព័ត៍មាន៖ Sportsmole