បរទេស៖ Pierre-Emerick Aubameyang ប្រធានក្រុមជម្រើសជាតិហ្គាបុង និងជាខ្សែប្រយុទ្ធឆ្នើម របស់ Barcelona បានសម្រេចព្យួរស្បែក​ជើងចូល​និវត្តន៍​ពីបាល់ទាត់អន្តរជាតិមួយសប្តាហ៍មុនពេលយុទ្ធនាការជម្រុះព្រឹត្តការណ៏ Africa Cup of Nations ឆ្នាំ ២០២៣ ចាប់ផ្តើម។កីឡាករវ័យ ៣២ ឆ្នាំរូបនេះ​បានបង្ហាញខ្លួនសរុបចំនួន ៦៨ ប្រកួតសម្រាប់ជម្រើសជាតិ និងស៊ុតបញ្ចូលទីបាន ២៩ គ្រាប់នាំអោយអតីតកីឡាករក្រុមDortmund និង Arsenal បានក្លាយ​ជាអ្នកស៊ុតបញ្ចូលទីច្រើនបំផុតសម្រាប់ប្រទេស ។

សហព័ន្ធកីឡាបាល់ទាត់ហ្គាបុង (Fegafoot) បានលើកឡើងថាៈ ពួកគេបានទទួលសំបុត្រពី Aubameyang លើការសម្រេចចិត្តរ​បស់​គាត់​។ដោយ​បាន​សរសេររៀបរាប់: បន្ទាប់ពី ១៣ ឆ្នាំនៃការបង្ហាញខ្លួនសម្រាប់ក្រុមជម្រើសជាតិរបស់ខ្ញុំដោយមោទនភាព ខ្ញុំចង់ប្រាប់ថាខ្ញុំនិងបញ្ចប់អាជីពជា​លក្ខណៈ​អន្តរជាតិរបស់ខ្ញុំនៅពេលនេះហើយ។ខ្ញុំ​សូម​អរគុណ​ប្រជាជន​ហ្គាបុង និង​អ្នក​ទាំង​អស់​ដែល​បាន​គាំទ្រ​ខ្ញុំ​ក្នុង​ពេល​វេលា​ល្អ និងមិនល្អរបស់ខ្ញុំ។ខ្ញុំតែង​តែចង​ចាំ​ថ្ងៃដ៏អស្ចារ្យដែលខ្ញុំបានបង្ហាញខ្លួនជាលើកដំបូង ក្រោយត្រលប់មកពីប្រទេសនីហ្សេរីយ៉ាជាមួយនឹងពានរង្វាន់កីឡាករឆ្នើមប្រចាំទ្វីបអាហ្រ្វិកវាគឺជា​ពេល​វេលា​ដែលមិនអាចបំភ្លេចបាន។

Aubameyang កើតនៅប្រទេសបារាំង ហើយបានបង្ហាញខ្លួនឱ្យក្រុមអាយុក្រោម ២១ ឆ្នាំរបស់បារាំង ប៉ុន្តែបានប្តូរទៅបង្ហាញខ្លួនអោយក្រុមជម្រើសជាតិ ដើម្បីដើរតាមគន្លងរបស់ឪពុកដែលបានធ្វើជាប្រធានក្រុមក្នុងការបង្ហាញខ្លួនលើកដំបូងក្នុងការប្រកួត Nations Cup វគ្គផ្តាច់ព្រ័ត្រក្នុងឆ្នាំ ១៩៩៤ ។​Aubameyang បង្ហាញខ្លួនជាអន្តរជាតិលើកដំបូង នៅប្រទេសម៉ារ៉ុកក្នុងឆ្នាំ ២០០៩ និងបង្ហាញខ្លួននៅក្នុងការប្រកួតព្រឹត្តការណ៏ Africa Cup of Nations ចំនួនបួនដង៕

ប្រភពព័ត៍មាន៖ BBC