បរទេស៖ ក្លឹបយក្ស Real Madrid ឈានដល់កិច្ចព្រមព្រៀងជាមួយ PSG ដើម្បីចុះហត្ថលេខានាំយកខ្សែប្រយុទ្ធ Kylian Mbappe មកកាន់ទឹកដី Santiago Bernabeu ដោយឥតគិតថ្លៃនៅពេលបញ្ចប់រដូវកាលនេះយោងគេហទំព័រ គេហទំព័រ Bild របស់អាល្លឺម៉ង់បានចុះផ្សាយ។

ក្រុ​មម្ចាស់ជើងឯក Champion League ១៣សម័យ បានកំណត់អត្តសញ្ញាណនាំយកកីឡាករ វ័យ ២៣ ឆ្នាំរូបនេះជាគោលដៅចម្បងរបស់ពួកគេ ហើយទោះបីជាបរាជ័យជាមួយនឹងការដេញថ្លៃ ក្នុងរង្វង់ទឹកប្រាក់ដល់ទៅ១៥៤លានផោន កាលពីរដូវក្តៅមុន។ ប៉ុន្តែទីបំផុតការចិញ្ចឹមចិត្ត យ៉ាងមុតមាំនៅតែបន្តមានមុនកិច្ចសន្យារបស់ Mbappe ​អស់សុពលភាពនៅទឹកដី Parc Des Prince នាខែមិថុនា២០២២ខាងមុខនេះ។

ប្រភពខាងលើបន្តថា Mbappe បានយល់ព្រមលើប្រាក់ឈ្នួលពលកម្មនឿយហត់មានតម្លៃប្រមាណ៤១.៥ លានផោនក្នុងមួយឆ្នាំ ទោះបី​ជារយៈពេលនៃកិច្ចព្រមព្រៀងនៅមិនទាន់បានបង្ហើបអោយដឹងនៅឡើយ។ សម្រាប់ PSG ដែលនៅតែមានសុទិដ្ឋិនិយមក្នុងការបន្តកុងត្រាថ្មីនា​ពេលកន្លងមក យ៉ាងណាក៏ដោយ ប៉ុន្តែផ្ទុយទៅវិញសមាជិកជ័យ លាភី World Cup ២០១៨រូបនេះ ហាក់បង្ហាញពី ចេតនា ផ្លាស់​ទៅកាន់ទឹកដី Santiago Bernabeu ច្រើនជាង។ Mbappe បច្ចុប្បន្ន ត្រូវ បានចាត់បញ្ចូលជាខ្សែប្រយុទ្ធឆ្នើមលំដាប់ពិភពបាល់ទាត់ ក្រោយ​ស៊ុតបញ្ចូលទីបាន ១៥១ គ្រាប់ និងបញ្ជូនបាល់ ឱ្យមិត្តរួមក្រុមបញ្ចប់ទី ៧៧ ដងក្នុងការបង្ហាញខ្លួន ១៩៩ លើក គ្រប់ ការ ប្រកួត​ទាំងអស់​សម្រាប់ PSG៕

ប្រភពព័ត៍មាន៖ Sportsmole