• Banner Banner Banner Banner Banner Banner
  • ប្រទេសចំនួន៦ គាំទ្រឱ្យ ឥណ្ឌូនេស៊ី ធ្វើម្ចាស់ផ្ទះ អាស៊ានប៉ារ៉ាហ្គេម តែត្រូវដោះស្រាយការពិន័យរបស់ WADA សិន
    កីឡាផ្សេងៗ 4 months ago 129 Views

    ក្រុមប្រឹក្សាភិបាល (BoG)  ​របស់​ សហព័ន្ធកីឡាជនពិការអាស៊ាន (APSF)  ​ភាគ​ច្រើន បាន​បោះ​ឆ្នោត​គាំទ្រ​ឱ្យ​ប្រទេសឥណ្ឌូនេស៊ី ធ្វើជាម្ចាស់ផ្ទះ​ការ​ប្រកួត​កីឡា​​អាស៊ាន​​ប៉ារ៉ា​ហ្គេម (ASEAN Para Games) លើកទី ១១ ជំនួសប្រទេសវៀតណាម ដែល​​បាន​លុប​ចោល​​ការ​​ប្រកួតនេះ ដោយ​សារវិបត្តិជំងឺកូវីដ​១៩ ​ជា​សកល កាលពី​ឆ្នាំ​២០២១។

    នៅក្នុង​កិច្ច​ប្រជុំតាមអនឡាញ Zoom ជា​បន្ទាប់មួយ កាលពី​ថ្ងៃ​ទី​១៥ ខែ​មករា ឆ្នាំ​២០២២ ដោយ​មានការ​ចូល​រួម​ពី​តំណាង​ប្រទេស​​កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន ថៃ និងវៀតណាម នោះគេ​មាន​ប្រទេស​ចំនួន​៦ បានគាំ​ទ្រ លើការ​ដេញ​ថ្លៃ​ធ្វើជា​ម្ចាស់​ផ្ទះ​របស់​ឥណ្ឌូនេស៊ី គឺ​មាន​ន័យ​ថា មានតែ​១ប្រទេស​ប៉ុណ្ណោះ មិនឯក​ភាព ព្រោះសិង្ហបុរី និងប្រ៊ុយណេ បានអវត្តមាន ចំណែក ឥណ្ឌូណេស៊ី មិនត្រូវបានគេ ដាក់ឱ្យ​បោះឆ្នោតនោះ​ទេ។

    ​តែ​ទោះជាយ៉ាងណាក៏ដោយ ប្រទេស​ឥណ្ឌូនេស៊ី​ ត្រូវ​​ធ្វើ​យ៉ាងណា លុប​ចោលនូវ​​ការ​ពិន័យ «ការ​មិន​អនុ​លោម​តាម​ការ​ត្រួតពិនិត្យ​ប្រកបដោយប្រសិទ្ធភាព» ដែល​ដាក់​ដោយ​ទី​ភ្នាក់ងារ​ប្រឆាំង​សារ​​ធាតុ​​​ញៀន​ពិភពលោក (WADA) នា​ពេល​បច្ចុប្បន្ន ជា​មុន​សិន ទើបអាច​​ឈាន​ទៅ​ធ្វើ​ជា​ម្ចាស់​ផ្ទះ​ការ​ប្រកួត​អាស៊ាន​ប៉ារ៉ាហ្គេម​នេះ​បាន ដោយក្នុង​នោះ ​ក្រុម​ប្រឹក្សា​ភិបាល​តំណាង​ប្រទេសនៅអាស៊ាន បានទុកពេល​ឱ្យ ឥណ្ឌូនេស៊ី ចំនួន​១​ខែ ដើម្បី​ដោះស្រាយ ឬស្រាយបំភ្លឺ លើបញ្ហានេះ។

    ជុំវិញ​បញ្ហានេះ លោក Osoth Bhavilai ប្រធាន​​សហព័ន្ធកីឡាជនពិការអាស៊ាន បាន​​ថ្លែង​ថា៖​ «ជា​លទ្ធផល ក្រុម​ប្រឹក្សាភិបាល បាន​កំណត់​ថ្ងៃ​ផុត​កំណត់ សម្រាប់​ប្រទេស​ឥណ្ឌូនេស៊ី នៅ​ថ្ងៃ​ទី ១៥ ខែ​កុម្ភៈ ដើម្បី​ធ្វើការ​ដោះ​ស្រាយ ​ចំពោះ​បញ្ហា​នេះ ហើយ​ចុង​ក្រោយ​ត្រូវ​បញ្ជាក់​អះ​អាង​ថា ការ​ប្រកាស​មិន​អនុលោម​តាម​ច្បាប់​របស់ WADA នោះ នឹង​ត្រូវ​លុប​ចោល»។

    លោកបាន​បន្ថែម​ថា៖ «ក្រុមប្រឹក្សាភិបាល​របស់ APSF នឹង​កោះ​ប្រជុំ​ពិសេស នៅ​ថ្ងៃ​ទី ១៧ ខែកុម្ភៈ ដើម្បី​ធ្វើ​ការ​ពិចារណា និង​បញ្ជាក់​ថា រាល់​តម្រូវ​ការ​ទាំង​អស់ ក្នុង​នោះ​រួម​ទាំង​នីតិវិធី​ដ៏​តឹងរឹង ដើម្បី​ទប់​ស្កាត់​ការ​ឆ្លង​ជំងឺកូវីដ១៩ ត្រូវ​បាន​អនុវត្ត មុន​ពេល​មាន​ការ​ប្រកាស​ជា​ផ្លូវការ​ថា ប្រទេស​ឥណ្ឌូនេស៊ី ជា​ម្ចាស់​ផ្ទះ​នៃ​ព្រឹត្តិការណ៍​អាស៊ាន​ប៉ារ៉ា​ហ្គេម ​លើក​ទី ១១»។

    ចំណែក លោក យី វាសនា អគ្គលេខាធិការ​គណៈកម្មាធិការ​ជាត់ប៉ារ៉ាឡាំពិកកម្ពុជា (NPCC) ដែលបានគាំ​ទ្រ​ឥណ្ឌូនេស៊ី ឱ្យ​រៀបចំការ​ប្រកួត​អាស៊ាន​ប៉ារ៉ាហ្គេម លើក​ទី​១​១​នេះ បាន​និយាយ​ថា៖​ «ក្រុមប្រឹក្សាភិបាលរបស់​​សហព័ន្ធកីឡាជនពិការអាស៊ាន បានទុកពេល​ឱ្យ ឥណ្ឌូនេស៊ី ១ខែ ដើម្បី​បង្ហាញនូវ​ឯក​សារ​មួយចំនួន ហើយ​បើសិនជា ឥណ្ឌូនេស៊ី អាច​ស្រាយ​បំភ្លឺនូវចម្ងល់​ដល់ប្រទេស​នៅ​ក្នុង​អាស៊ាន បាន​គ្រប់គ្រាន់ហើយ នោះ​ការ​ប្រកួតអាស៊ាន​ប៉ារ៉ា​ហ្គេម នឹងត្រូវធ្វើ​ឡើង ក្នុងខែ​កក្កដា»។

    សម្រាប់ការ​បង្ហាញ​ពី​ឆន្ទៈ ក្នុងការ​ដេញ​ថ្លៃ ដើម្បី​បាន​រៀបចំ ការ​ប្រកួតអាស៊ាន​ប៉ារ៉ាហ្គេម លើកទី​១១​នេះ ប្រទេស​ឥណ្ឌូណេស៊ី បានស្នើឱ្យការប្រកួត​ នៅលើ​ប្រភេទ​កីឡា​ចំនួន​១៣ ដែល​ត្រូវ​ធ្វើ​នៅទី​ក្រុង Solo ចាប់ពីថ្ងៃទី២០ ដល់ថ្ងៃទី ៣១ ខែកក្កដា ឆ្នាំ​២០២២ ហើយ​ប្រទេស​នេះ ​ក៏​ធ្លាប់​​រៀបចំ​ការ​ប្រកួត​ ASEAN Para Games លើកទី៦ នៅទីក្រុង Solo ឆ្នាំ២០១១ និង Asian Para Games ឆ្នាំ២០១៨ នៅទីក្រុង Jakarta ផង​ដែរ៕

  • Loading...
  • Recent Posts