បរទេស៖ គ្រូបង្វឹក Thomas Tuchel បានគាំទ្រខ្សែការពារស្លាបឆ្វេង កីឡាករ Marcos Alonso ព្យាយាមបង្ហាញសមត្ថភាព អោយ​បាន​ល្អនៅពេលអវត្តមានរបស់កីឡាកររូមក្រុម Ben Chilwell។

គួរបញ្ជាក់ថាកីឡាករអន្តរជាតិអេស្បាញ Alonso ត្រូវបាន​ដាក់​អោយអង្គុយលេងជាកីឡាករ​បម្រុងក្នុងរយៈពេលពីរខែចុងក្រោយ ខណៈកីឡាករអន្តរជាតិ Chilwell ត្រូវបាន​ដាក់​អោយ​​លេង​យ៉ាងទៀងទាត់នៅលើទីលានគ្រប់ក្របខណ្ឌប្រកួត។ ទោះជាយ៉ាងណាកីឡាករអន្តរជាតិអង់គ្លេសនឹងអវត្តមានរហូតដល់ឆ្នាំ២០២២ក្រោយរងរបួសពេលផ្តួល ​Juventus កាលពី​សប្តាហ៍មុននៅក្របខណ្ឌ Champion League ។

ថ្លែងប្រាប់សារព័ត៌មានក្នុងសន្និសីទសារព័ត៌មានគ្រូបង្វឹកសញ្ជាតិអាឡឺម៉ង់​បានបញ្ជាក់យ៉ាងដូច្នេះថា៖ «ជាដំបូងយើងមាន Marcos ដែលបានចាប់ផ្តើមរដូវកាលសម្រាប់ពួកយើងនៅពេលដែល Chilwell មានការលំបាកបន្តិច។ យើងជឿជាក់លើគាត់ យើងបានឈ្នះការប្រកួត Premier League ជាបន្តបន្ទាប់ ​ព្រោះ​Alonso គឺមានបទពិសោធន៍ច្រើន។ ប្រសិនបើអ្នកក្រឡេកមើលកាលវិភាគ ហើយគិតថា Marcos ត្រូវលេងប្រាំបីប្រកួត​រៀង​រាល់បីថ្ងៃ? ប្រហែលជាមិនអាចទេ។ ប៉ុន្តែយើងនៅមាន Callum [Hudson-Odoi] ដែលអាចមកជួយហើយ​យើង​មាន​គំនិត​ផ្សេង​ទៀត​ដែល​យើង​អាច​សាកល្បង»។ Alonso បានបង្ហាញខ្លួនសរុបបានចំនួន ១១ លើក លេងជាកីឡាករបម្រុង១ប្រកួត ក្នុងការបង្ហាញខ្លួនគ្រប់ក្រប​ខណ្ឌប្រកួត​នៅ​រដូវកាលនេះ៕

ប្រភពព័ត៍មាន៖ Sportsmole