បរទេស៖​ កីឡាករ Dominik Szoboszlai បាន​ស៊ុត​បាល់​ប៉េណាល់​១​គ្រាប់ នៅ​ជិត​បញ្ចប់​ការ​ប្រកួត ខណៈដែលក្រុម RB Leipzig បាន​ធ្វើ​ឲ្យ​ក្រុម Paris Saint-Germain ដែល​អវត្តមាន​តារាឆ្នើម Lionel Messi ត្រឹម​តែ​អាច​បញ្ចប់ក្នុងលទ្ធ​ផល​ស្មើ ២-២ ក្នុងការ​ប្រកួតក្រប​ខ័ណ្ឌ Champions League កាលពីថ្ងៃ​ពុធ​។

PSG ទំនង​ដូច​ជា​ស្ថិតលើផ្លូវ​នៃ​ការ​ដណ្តើម​បាន​ជ័យ​ជម្នះ​ទៅ​ហើយ ក្រោយ​ពី​បាន​នាំមុខ ២-១ របូត​ដល់នាទី​បន្ថែម ខណៈ​ដែល Georginio Wijnaldum បាន​ស៊ុត​បាល់​បញ្ចូល​ទី​២​គ្រាប់ ដើម្បី​តាមស្មើគ្រាប់បាល់ដើម​តង់​របស់ Christopher Nkunku សម្រាប់​ក្រុមម្ចាស់ផ្ទះ​។ ក្នុង​រយៈពេល​ត្រឹម​តែ​ប៉ុន្មាន​វិនាទី​ចុងក្រោយ Leipzig បាន​ទទួល​បាល់​ប៉េណាល់ទី​ នៅពេល​ដែលខ្សែ​ការ​ពារ Presnel Kimpembe របស់ PSG បាន​ប្រព្រឹត្តកំហុស​លើ Nkunku ក្នុងពេល​បញ្ជូន​បាល់​ឆ្លង ហើយ​កីឡាករ​បម្រុង Szoboszlai ក៏​បាន​ស៊ុត​បាល់​បំ​ប៉ោង​សំណាញ់ទី​ពី​ចំណុច​ពិន័យ​១១​ម៉ែត្រ​តែម្តង​។

ស្រប​ពេល​ដែល Messi មាន​បញ្ហា​របួស ការ​ទទួល​បានលទ្ធផល​ស្មើនេះ ធ្វើ​ឲ្យ PSG បាត់​បង់​ចំណាត់​ថ្នាក់លេខ​១ក្នុងពូល និង​​បាន​ធ្វើ​ឲ្យពួកគេ​​តាមពីក្រោយក្រុម​កំពុង​នាំមុខ Manchester City ដែលបានផ្តួលក្រុម Club Brugge ៤-១ ចំនួន​១ពិន្ទុ​។ ក្រុម PSG នឹង​ត្រូ​វ​ធ្វើ​ដំណើរ​ទៅជួបក្រុម Man City ក្នុង​រយៈពេល​៣​សប្តាហ៍​ទៀត​៕

ប្រភព​ព័ត៌មាន៖ Channel News Asia