• រិន ដេវីត ប្តេជ្ញាដណ្តើមឱ្យបានប្រាក់លាន ដើម្បីទិញម៉ូតូថ្មី តែហាក់នៅបារម្ភកណ្តាប់ដៃ ជី ឆៃលី
    ប្រដាល់ក្នុងស្រុក 4 weeks ago 83 Views

    កីឡាករ​​ជម្រើស​ជាតិគុនខ្មែរ ដែលទើប​ជួបរឿងសង្វែងចិត្ត ចំពោះ​ការ​បាត់ម៉ូតូ រិន ដាវីត បាន​ប្តេជ្ញា​ចិត្ត​យ៉ាងមុតមាំ​ថា ​ត្រូវ​ខំប្រឹង​ប្រកួត​ដណ្តើមឱ្យ​បាន​ប្រាក់​លាន សម្រាប់​ការ​ប្រកួត​ម៉ារ៉ាតុងដណ្តើម​ប្រាក់​លាន ទម្ងន់​៥៤​គីឡូក្រាម នៅ​លើ​សង្វៀន​ថោន នា​​ថ្ងៃអាទិត្យ​នេះ ដើម្បី​អាច​មាន​​ប្រាក់ យក​មក​ទិញ​ម៉ូតូថ្មី សម្រាប់​ជិះ​ធ្វើ​ដំណើរ​វិញ។

    សម្រាប់ការ​ប្រកួត​លើកនេះ ​រិន ដាវីត នឹងត្រូវ​ជួប​សុទ្ធតែ​ជា​ខ្លាំង ដែល​រូបគេ​ធ្លាប់​ជួបកន្លងមក ក្នុង​នោះមាន ហ៊ឹម គឹមរៀង និង ជី ឆៃលី ដែល​រូបគេ​ធ្លាប់បានចាញ់កន្លង​មក និង ភួន ឡាំង​កូស៊ីន ដែលទើប​ជួបគ្នា នៅ​វគ្គ​ផ្តាច់​ព្រ័ត្រ ដណ្តើម​ខ្សែ​ក្រវាត់មាស នៅ​លើ​សង្វៀន PNN ដោយ​កាល​នោះ រិន ដាវីត បានយក​ឈ្នះ ឡាំងកូស៊ីន ដោយពិន្ទុ​ទាំង​លំបាក ហើយការ​សម្រេច​ឱ្យ រិន ដាវីត ឈ្នះ​នោះ ក៏បាន​ធ្វើ​ឱ្យ ភួន ឡាំងកូស៊ីន បាក់​ទឹក​ចិត្ត និងស្រែក​យំ នៅ​ក្រោយការ​ប្រកួត​ផង​ដែរ​ ដោយសារ ឡាំងកូស៊ីន គិត​ថា រូបគេ​ទៅវិញ​ទេ ដែល​សមជា​អ្នក​ឈ្នះ និង​ទទួលបានខ្សែ​ក្រវាត់​នោះ។

    ​ទាក់ទង​នឹងការ​ប្រកួតនេះ រិន ដាវីត ​បាន​និយាយ​ថា៖​«ពួក​គេ​ទាំង​៣​នាក់នេះ ​សុទ្ធ​តែជា​ជើង​ខ្លាំង​លំបាក​យក​ឈ្នះ​ ប៉ុន្តែ​ខ្ញុំ​ត្រូវ​ការ​ឈ្នះ​ប្រាក់​លាន​នេះម្តង​ទៀត ​ដើម្បី​ទិញ​ម៉ូ​តូ​ ព្រោះ​កាល​ពី​ថ្ងៃ​ចន្ទ​ ចោរ​​បាន​គាស់​ផ្ទះ​ និង​លួច​ម៉ូ​តូ​ខ្ញុំ​បាត់​ទៅ​​ហើយ​ ខណៈ​​​ម៉ូ​តូ​នេះ ​បាន​មក​ពី​ការ​​ឡើង​ប្រ​កួត ​សន្សំ​លុយ ​ក្រៅ​ពី​ហូប​ចុក​ក្នុង​គ្រួសារ ​ទើប​តែ​ទិញ​បាន​ ឥឡូវ​បាត់​ទៅ​ គ្មាន​អ្វី​ជិះ​ធ្វើ​ដំណើ​ទេ»​។

    យ៉ាងណា​ក៏​ដោយ នៅ​​ក្នុង​ចំណោម​អ្នក​ប្រដាល់​៣​នាក់​ រិន ដាវីត ហាក់បារម្ភ​ទៅ​លើ​កណ្តាប់​ដៃ ជី ឆៃលី ជាង​គេ។ ដាវីត បាន​បញ្ជាក់ថា៖​«ខ្ញុំ​ធ្លាប់​ឈ្នះ​តែ​ ភួន ​ឡាំង​កូស៊ីន​ មួយ​ទេ ចំណែក​ ហ៊ឹម ​គឹម​រៀង ​ខ្ញុំ​ធ្លាប់​ចាញ់​ចំនួន​៣​ដង ​និង​ ​ជី ឆៃ​លី​ ខ្ញុំ​ធ្លាប់​ចាញ់​១​ដង។ ជើង​ថ្មី ​ជី ឆៃ​លី មាន​​កណ្តាប់​ដៃ​ធ្ងន់ លំបាក់​យក​ឈ្នះ​ណាស់ ​ចំណែក ​ហ៊ឹម ​គឹម​រៀង​ ខ្ញុំ​គ្មាន​ញញើត​ទេ​ ទោះ​ជា​ធ្លាប់​ឈ្នះ​ខ្ញុំ​៣​លើកក៏​ដោយ​ គឺ​ខ្ញុំ​សង្ឃឹមថា នឹង​​វ៉ៃ​សង​សឹក​ ដោយ​ឈ្នះ​ឱ្យ​បាន ​គឺ​សង្ឃឹម​៩០​ភាគ​រយ​»។

    តាម​ស្ថិតិ​ប្រ​កួត​របស់​កីឡាករ​ទាំង​៤​នាក់ ​ដែល​​​ទទួល​បាន​ពី​គណៈ​កម្មការ​ផ្គូផ្គង គឺ​​​បេក្ខភាព​ទាំង​៤នាក់នេះ មាន​​បទ​ពិសោធ​ប្រហាក់​ប្រហែល​គ្នា​ ប៉ុន្តែ​​មួយ​រយៈ​ចុង​ក្រោយ​នេះ​ ​រិន ​ដាវីត ​មាន​លក្ខណៈ​លេច​ធ្លោ​ជាង​គេ ​ដោយ​ឈ្នះ​ជយ​លាភី​ផ្ទួនៗ​ ពិសេសការ​​ឈ្នះ​៣​ប្រកួត​ចុង​ក្រោយ​ ដែល​បាន​លុយ​ច្រើន​បំផុត ​គឺ​ឈ្នះ​ យ៉ន ​ពិសី ពេលដណ្តើម​​ពាន​ផ្តាច់​ព្រ័ត្រ ​នៅ​សង្វៀន​ប៉ុស្តិ៍​លេខ​៥​ ឈ្នះ ភួន ​ឡាំង​កូស៊ី​ន ក្នុងការ​ប្រកួត​ផ្តាច់​ព្រ័ត្រ ​ដណ្តើម​ខ្សែ​ក្រវាត់មាស ​នៅ ​PNN​ និង​ឈ្នះ​ ធន់ ផានិត ​ដើម្បី​ឈ្នះ​បាន​ប្រាក់​លាន ​ប្រចាំ​សប្តាហ៍​ នៅ​សង្វៀន​ថោន​​នេះ កន្លង​មក។​​

    ចំណែក​លោក​ ធន់​ សុភា​ គ្រូ​បង្វឹក ​ជី ​ឆៃ​លី​ បាន​និយាយ​ថា​៖ ​«ឆៃ​លី ​មាន​ក្បាច់​ទាត់​ និង​ចេញ​កណ្តាប់​ដៃ​ធ្ងន់​ និង​ធ្លាប់​ឈ្នះ​ រិន ដាវីត ​ប៉ុន្តែ​ពិត​ជា​លំបាក​ទប់​ទល់​ក្បាច់​ជង្គង់​របស់ រិន ដាវីត ណាស់​ អ៊ីចឹង​​​ការ​ប្រ​កួត​លើក​នេះ ​ខ្ញុំ​សង្ឃឹម​​ត្រឹម​៥០​ភាគ​រយទេ ព្រោះ​គេ​ខ្លាំងៗ​ តែ​ធានា​វ៉ៃ​អស់​ពី​សមត្ថភាព»។

    ​​ស្រដៀងគ្នា​នេះ លោក​ សាន់​ សៅ​យ៉ាន់​ គ្រូ​បង្វឹក​របស់ ភួន ​ឡាំង​កូស៊ីន​ ក៏​មិន​មានរំពឹង​ខ្ពស់​លើ​សិស្ស​របស់ខ្លួន​នោះ​ដែរ ដោយ​លោកបាន​ប្រាប់​ថា​៖«​ក្នុង​ចំណោម​អ្នក​ប្រ​ដាល់​ទាំង​៣​នេះ ​ពិត​ជា​លំបាក​ប្រ​កួត​ ​ព្រោះ​ពួកគេ ​មាន​ក្បាច់​ប្រ​កួត​ល្អ​ដូច​គ្នា ដោយ​​សមត្ថភាព​ អាច​នឹង​លើស​គ្នា​បន្តិច​បន្តួច។ ទោះ​យ៉ាង​ណា ​​ខ្ញុំ​ធានា​ឱ្យ​ ឡាំងកូស៊ីន ​វ៉ៃ​អស់​ពី​សមត្ថភាព ​តែ​សង្ឃឹម​ឈ្នះ​៦០​ភាគ​រយ​ប៉ុណ្ណោះ​»៕

  • Loading...
  • Recent Posts