• ទីលានវាយសីស្តង់ដារអន្តរជាតិមួយ នឹងត្រូវសាងសង់ឡើង នៅក្រោយព្រះបរមរាជវាំង
    កីឡាផ្សេងៗ 1 month ago 87 Views

    ក្រុមប្រឹក្សាកីឡាក្រសួងមហាផ្ទៃ នឹង​សាង​សង់​ទី​លាន​វាយ​សីមួយលំដាប់ស្តង់ដារ​អន្តរ​ជាតិ នៅអង្គភាព អង្គរក្ស ក្រោយព្រះបរមរាជវាំង ​ក្រោម​ការ​ឧបត្ថម្ភ​ថវិកា​ពី​​លោក​ឧបនាយក​រដ្ឋមន្រ្តី រដ្ឋមន្រ្តី​ក្រសួង​មហាផ្ទៃ ស ខេង ដើម្បី​ទុក​បម្រើ​ដល់ការ​ប្រកួត​​ទាំង​ថ្នាក់​​ជាតិ និង​​អន្តរជាតិ នៃ​ក្របខ័ណ្ឌ​ក្រសួង​មហាផ្ទៃ។

    លោក​ឧត្តមសេនីយ៍ឯក បណ្ឌិត ជា ប៊ុនហេង អគ្គលេខា​ធិការ​ក្រុម​ប្រឹក្សា​កីឡា​ក្រសួង​មហាផ្ទៃ និងលោកជំទាវ ​កាល​ពី​រសៀល​ថ្ងៃចន្ទ ម្សិល​មិញ បានអញ្ជើញចូលរួមជាអធិបតី ក្នុងពិធីក្រុងពាលី សាងសង់ទីលានវាយសី​ក្រសួងមហាផ្ទៃ​នេះ ដោយ​ទីលាន​មួយនេះ គ្រោង​​ចំណាយ​​ប្រាក់​ប្រមាណ​ជាង​២០​ម៉ឺន​ដុល្លារ ដើម្បី​សាងសង់។

    នៅ​ក្នុងពិធីក្រុងពាលីនោះ លោក ជា ប៊ុនហេង ​បាន​ថ្លែង​ថា៖​«ទីលាន​វាយសី​របស់​ក្រសួង​មហា​ផ្ទៃមួយនេះ ជា​ទីលាន​ស្តង់​ដារ​អន្តរជាតិ​មួយ ដែល​អាច​រៀបចំ​ការ​ប្រកួត​អន្តរ​ជាតិ​នានា​បាន​ទៅ​ថ្ងៃមុខ ហើយ​ក៏ជា​ទីលាន​មួយ ដែល​មានស្តង់ដារ​លំដាប់​កំពូល​ផងដែរ បើ​ធៀប​នឹង​ទីលាន​វាយ​សី​ទាំងអស់​ នៅទូទាំងព្រះរាជាណាចក្រកម្ពុជា»។

    លោក​ឧត្តមសេនីយ៍ឯក បណ្ឌិត ជា ប៊ុនហេង ​បាន​ប្រាប់ឱ្យ​ដឹង​ទៀត​ថា ទៅថ្ងៃខាង​មុខ ក្រសួង​មហា​ផ្ទៃ នឹង​អញ្ជើញ​បណ្តា​ប្រទេស​នៅ​តំបន់​អាស៊ាន មក​ចូលរួម​ប្រកួត​ប្រជែង​លក្ខណៈ​​មិត្ត​ភាព​អន្តរជាតិ​នានា នៅពេលដែល​ទីលាន​មួយ​នេះ បាន​សាងសង់រួចរាល់ ហើយ​ទីលាន​នេះ​មាន​ទំហំ​ទទឹង​២០​ម៉ែត្រ និង​បណ្តោយ​៤១ម៉ែត្រ ដោយ​​គ្រោង​​ចំណាយ​ថវិកា​សាង​សង់​​ប្រមាណ​ជាង​២សែនដុល្លារអាមេរិក។

    សម្រាប់​ថវិកាចំណាយ​លើ​ការ​សងសង់ទី​លាន​វាយសីនេះ ជាអំណោយ​ដ៏​ថ្លៃ​ថ្លា​របស់​លោក​​ឧបនាយក​រដ្ឋមន្រ្តី រដ្ឋមន្រ្តី​​ក្រសួងមហាផ្ទៃ ស ខេង ​ព្រមទាំង​​មាន​ការ​សម្រប​សម្រួល​ផ្តល់​​ទីតាំង​​​ដោយ​​លោក​​សន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ ក្រោម​ការ​សហ​ប្រតិ​​បត្តិ​ការ​សាងសង់ដោយ​លោក​ឧត្តមសេនីយ៍ឯក​បណ្ឌិត ជា ប៊ុនហេង និងលោក​ឧត្ដម​សេនីយ៍​ឯក យឹម លាង អគ្គស្នងការរង នគរបាលជាតិកម្ពុជា ហើយ​ទីលាននេះ​គ្រោង​នឹង​បញ្ចប់​ការ​សាងសង់​ទាំង​ស្រុង នៅ​អំឡុង​ខែមិថុនា ឆ្នាំ២០២១៕

  • Loading...
  • Recent Posts